سونا فرج‌زاده: حیات یولداشیمین حؤکمونو دییشمه‌دی‌لر
- توضیحات
- منتشر شده در چهارشنبه, 16 بهمن 1392 02:20
آذوح: ایرانین آلی محکمه‌سی بو یاخین‌لاردا هر بیری دوققوز ایل حبس جزاسینا محکوم ائدیلمیش و بیر ایلدن آرتیق‌دیر حبسده ساخلانیلان یئنی گونئی آذربایجان میللی اویانیش حرکاتی‌نین (یئنی گاموح) بئش مرکزی کومیته عضوونون آپپئلیاسیا شیکایتینی رد ائدیب.
مهبوس‌لاردان بیری یوروش مئهرعلیبئیلینین خانیمی سونا فرج‌زاده حیات یولداشی و دیگر دؤرد مهبوسون دورومو حاقیندا آمئریکانین سسینه موصاحیبه وئریب. اؤزو ده اؤتن ایللرده حبس و موهاکیمه‌یه معروض قالمیش گونئی‌لی معلمه همچی‌نین حسن روحانی حکومتی‌نین سیاسی مهبوس‌لار و قئیری-فارس توپلوم‌لارین حقوق‌لاری ایله باغلی وئردیگی سؤزلر حاقیندا دوشونجه‌لرینی ایفاده ائدیب.
“بو، قئیری-اینسانی، قئیری-حقوقی حؤکم‌دور،” دئیه سونا فرج‌زاده محکمه‌نین قرارینی شرح ائدیب. اونون دئدیگینه گؤره گونیئ‌لی مهبوس‌لار آذربایجان توپلومونون ائلئمئنتار حقوق‌لاری اوغروندا موباریزه آپاردیق‌لارینا گؤره جزالاندیریلیرلار.
یوروش مئهرعلیبئیلی (آیت)، لطیف حسنی، محمود فضلی، شهرام رادمئهر و بئهبود قولوزاده اؤتن ایلین جولای و آگوست آیلاریندا ۲۸ گون آجلیق قرئوی کئچیرمیشدی‌لر. همین گون‌لرده آمئریکانین سسینه موصاحیبه وئرن یئنی گاموح تشکیلاتین باشقانی لطیف حسنی‌نین خانیمی ازم پیری‌نین سؤزلرینه گؤره، بئش مهبوس سورغو-سوال و موهاکیمه پروسئس‌لرینده باش وئرن قانونسوزلوق‌لار، اونلارا قارشی چیخاریلان آغیر حبس جزاسی، هابئله آپئلیاسیا محکمه‌سینده حقوقی ظوابطون پوزولماسینا اعتیراض اولا‌راق آجلیغا باشلامیشدی‌لار.
سونا فرج‌زاده ده کاسساسسیا شیکایتی‌نین محکمه ظوابطونده یول وئریلمیش قانونسوزلوق‌لارا اعتیراض ماهیتی داشیدیغینی قئید ائدیب. اونون دئدیک‌لرینه گؤره، کاسساسسیا شیکایتی وئریلن جزانین ایره‌لی سورولن اتهام‌لارلا موتناسیب اولماماسی، اتهام‌لارین سندسیز شکیلده ایره‌لی سورولمه‌سی و مهبوس‌لارا مدافعه اوچون یئترلی زامان وئریلممه‌سی کیمی خوسوس‌لارا اساس‌لانا‌راق حاضیرلانمیشدی.
اؤتن ایل آجلیق قرئوینه باشلادیق‌لاری زامان تبریزدن کرجین رجایی-شهر زیندانینا سورگون ائدیلن یئنی گاموح لیدئرلری سون زامان‌لاردا تکرار تبریز زیندانینا کؤچورولوب‌لر. سونا خانیمین سؤزلرینه گؤره، “مهبوس‌لارین تبریزه کؤچورولمه‌سی تبریزه یاخین بؤلگه‌لرده یاشایان عائله‌لر اوچون یاخشی خبر اولوب، آنجاق، مهبوس‌لاردان بیری لطیف حسنی‌نین عائله‌سی کرج شهرینده یاشاییر و ایندیکی شرایط اونلار اوچون چتین اولا‌جاق‌دیر.”
سونا فرج‌زاده همچی‌نین جمهورباشخانی حسن روحانی‌نین سیاسی مهبوس‌لارین دورومو و قئیری-فارس ائتنیک قروپ‌لارین حقوق‌لارینا دایر وئردیگی سؤزلر، ائله‌جه ده ایرانین قئیری-فارس ائتنیک قروپ‌لار و دینی آزلیق‌لارلا باغلی مسئله‌لری اوزره جمهورباشخانی یاردیمچی‌سی علی یونئسی‌نین بو یاخین‌لاردا آنا دیل‌لری‌نین تدری‌سی حاقیندا صحبت‌لری ایله باغلی اؤز دوشونجه‌لرینی آمئریکانین سسی ایله پایلاشیب.
بو ودلرین اومومیتله صمیمی اولمادیغینا اینانان فرج‌زاده‌نین دئدیک‌لرینه گؤره، علی یونئسی‌نین وظیفه‌سی قئیری-فارس ائتنیک قروپ‌لارین مسئله‌لری ایله علاقه‌لی اولسا دا، او همین جمعیت‌لرین حاق‌لارینی مدافعه ائتدیک‌لری اوچون دوققوز ایل حبسه محکوم اولونموش فعال‌لارین عائله‌لری‌نین سؤزلرینی ائشیتمه‌یه حاضر اولمور.
سونا خانیم کیچیک اوغلو تاتارین آتاسی اوچون داریخدیغینی سؤیله‌ییب: “تاتارین آتاسینا چوخ احتیاجی وار. او، چوخ داریخیر.”
آمریکاسسی
