تایماز مئهرعلیبئیلی: اطلاعات قارداشیمین حیات یولداشینی دا حبس ائتمکله تهدید ائدیر
- توضیحات
- منتشر شده در پنج شنبه, 04 ارديبهشت 1393 16:09
آذوح: “قارداشیم معروض قالدیغی حاق‌سیزلیق و اذیت‌لر، ائله‌جه ده تهلوکه‌سیزلیک قوروم‌لاری‌نین عائله‌سی، خصوصیله حیات یولداشی سونا خانیما قارشی تطبیق ائتدیگی باسقی‌لار و تهدیدلره اعتیراض اولا‌راق آجلیق ائدیر،” دئیه آپریلین ۱۵-دن تبریز زیندانیندا آجلیق قرئوینه باشلامیش گونئی‌لی مهبوس یوروش (آیت) مئهرعلیبئیلینین قارداشی تایماز مئهرعلیبئیلی آمئریکانین سسی ایله صحبتده بیلدیریب. اونون سؤزلرینه گؤره حبس اولونموش فعالین عائله‌سی ایران حکومت اورقان‌لاری طرفین‌دن مونتزم باسقی‌لارا معروض قالیب.
یوروش مئهرعلیبئیلی یئنی گونئی آذربایجان میللی اویانیش حرکاتی (یئنی گاموح) تشکیلاتی‌نین مرکزی کومیته عضوودور. ۲۰۱۲-جی ایلین دسامبری و ۲۰۱۳ ژانویه و فوریه آیلاریندا اطلاعات مامورلاری طرفین‌دن حبس ائدیلمیش یئنی گاموح لیدئرلری یوروش مئهرعلیبئیلی، محمود فضلی لطیف حسنی، شهرام رادمئهر و بئهبود قولوزاده قئیری-قانونی تشکیلات قورماق” و “ایران ایسلام جمهوریسینا قارشی تبلیغات آپارماق”دا اتهام ائدیله‌رک هر بیری ۹ ایل حبسه محکوم ائدیلیب.
“یوروش سیاسی بیر مهبوس اولا‌راق اؤزو و دیگر مهبوس‌لارین حقوقونو طلب ائدیر. عائله‌سینه قارشی باسقی‌لار و تهدیدلره سون وئریلمه‌سینه ایسته ییر. اونون عائله‌سینه چوخ تضییق ائدیب‌لر… کئچن دفعه توتولدوغوندا یوروشو کیچیک اوغلونون یانیندا دؤیموشدولر. سونرا حیات یولداشینی حبس ائتدی‌لر… سونا خانیمی ۱۰ گون اؤنجه چاغیریب، یئنه ده حبس ائتمکله تهدید ائدیب‌لر. بوتون عائلنی تهدید ائدیرلر، مئدیا ایله دانیشدیغیمیز تقدیرده بیزی ده حبس ائده‌جک‌لرینی سؤیلییرلر،” دئیه تایماز مئهرعلیبئیلی سؤیله‌ییب.
مهبوسون قارداشی یئنی گاموح لیدئرلری‌نین اؤتن ایلین جولای و آگوست آیلاریندا کئچیردیگی ۲۸ گونلوک آجلیق قرئوینه ایشاره ائده‌رک، اونلارین او واخت شرط‌لی اولا‌راق آجلیغا سون وئردیک‌لری و او شرط‌لرین بو گون ده یئرینه گتیریلمدیگینی قئید ائدیب.
یئنی گاموح عضوو بئهبود قولوزاده‌نین موا‌لیجه و عملیات اوچون مزونیته چیخماسینا ایجازه وئریلیب. لاکین، تایماز مئهرعلیبئیلینین دئدیگینه گؤره، دیگر مهبوس‌لارین دا جدی شکیلده موا‌لیجه‌یه احتیاج‌لار وار. او، همچی‌نین تبریزدن اوزاقدا یاشایان عائله‌لرین مهبوس‌لارلا گؤروشمک اوچون تبریزه گلمکده پروبلئم‌لر یاشادیغینی، و قارداشی‌نین آجلیق قرئوی ایله بو مسئلنی ده گوندمه گتیردیگینی وورغولاییب.
“مزونیته چیخماق مهبوس‌لارین حاقی‌دیر. موا‌لیجه اولماغا احتیاج‌لاری اولماسا بئله، اونلارا اؤز هاقلاریندان ایستیفاده ائتمک اوچون ایجازه وئریلمه‌لی‌دیر… دیگر مهبوس‌لار، خصوصیله لطیف حسنی‌نین عائله‌سی تبریزدن اوزاق شهرلرده یاشاییرلار. یوروش همچی‌نین اونلارین اؤز شهرلرینه کؤچورولمه‌سینی طلب ائدیب” دئیه گونئی‌لی مهبوسون قارداشی علاوه ائدیب.
