یاس تؤرنی: آزربایجانین میللتچی شاعیری علیرضا بخشی حایاتینی دییشدی
- توضیحات
- منتشر شده در شنبه, 23 خرداد 1394 07:51
آذوح: دوز گونو (دوشنبه)، مین اوچ یوز دوخسان دؤردونجو ایلین قیزاران آیینین اون بیرینجی گونونده 11/03/1394 اردبیل شهرینین امام خسته خاناسیندا دویغولو، درین دوشونجه لی، میللتچی اردبیللی شاعیریمیز علیرضا بخشی اؤرک چاتیشماماسی خسته لیگین نتیجه سینده حایاتینی دییشیب و تانرییا قوووشدو.
بو قیرخ یاشیندا گنج شاعیر 1389 اونجو ایلدن شعر دئییب یازماغا باشلاییب و بو یولدا آددیم آددیم ایرَلی گلیب و اؤز یاشاییشینین آجی ایله آغریلاریلان میللتینین آجی و آغریلارین دویوب؛ قاتیب و شعرلرینده هر ایکیسینی عکس ائدمیشدیر.
بو شاعیر اردبیلده میللتچی گنجلریمیزلن ایلگی قاتیب، اوتوروب دوروب و آیاقلاشمیشدیر و اونلاردان الهام آلاراق اؤز شعرلرینی یارادماقدا ایدی. اوندان یالنیز بیر شعر دفتری «آجی سئچیملر» آدیلان چاپ اولماق عرفه سینده ایدی.
نه یازیق اجل یئلی اسدی و اونون چیچکلنمه یینه آمان وئرمدی و اونو آچمامیش یاپراقلادی. بو شاعیرین یاس تؤرنی چرشنبه گونو 13/03/1394 جیرال یولونون امام حسین مسجدینده توتولدو . اردبیلده بوتون میللتچی ایگیدلریمیزین اونون یاس تؤرنینه قاتیلدیلار.
بو میللتچی شاعیره گؤره بیر شعر اوخوماق تؤرنی اردبیلده سرچشمه ده شمس کوچه سینین حوزه هنری ائوینده، سه شنبه 19/03/1394 گون اورتادان سونرا دوستلارینین کؤمکی ایلن، اؤزللکیه خانیم افسون به¬نژاد و دوکتور شهریار نعمتی و امیر رجبی توتولدو.
بو مراسیم ده اردبیلین، نیرین، نمینین، سرعینین، خالخالین و انزلینین میللتچی شاعیرلری، رحیم قولامی بی اردبیلدن، روزبه صمدی بی (نیراوغلو) نیر شهریندن، بهبود مرادی بی (خالخاللی ائلچی انزلی دن)، رحیم اسداللهی بی (قارتال) سرعین دن، هاشم فعال بی اردبیلدن و سایریلار شعرلرین اوخودولار و اونو تانیتدیردیلار
آزربایجان میللتینین باشی ساغ اولسون.
بو شاعیردن بیر شعر بوتون آزربایجان میللتینه سونولور:
گؤزل آختارما منی
گوذرانیم قارادیر گؤزل آختارما منی گزدیگین یئر هارادیر؟ گؤزل آختارما منی
من ارنلر ائلینین بیچیلن آل دیلی¬یم یاسلی اؤلکه¬¬¬م پارادیر گؤزل آختارما منی
ساوالان تک بو دؤشوم درد اوْدویلان قالانیب قان چاناقلار یارادیر گؤزل آختارما منی
منیم عونوانیمی گز آرپاچاییندان خبر آل خان چوبانسیز سارادیر گؤزل آختارما منی
بو ائلین توپراقینا مین بئله جانیم قوربان قوربتیمه چارادیر گؤزل آختارما منی
چکدیلر بنده منی قویما هارایلار سوسسون گومانیم تک دارادیر گؤزل آختارما منی
