قهرمانلاریمیزین گنجینه‌سین نئجه تانییاق- محمد عباس پور
- توضیحات
- منتشر شده در پنج شنبه, 24 بهمن 1392 22:29
“عطیه خانیم طاهری و دوسداقداکی باشقا قهرمانلاریمیزین حیات یولداشلارینا اتحاف اولورنور”
timthumb (1) هامیمیز آزدان-چوخدان مارتین لوتر، نلسون ماندلا، باشقا متفکیرلر، اینانجلی و دایاناقلی اینسانلارین یاشاییشلارینین بیر قیسمی‌نی اوخویوب، نئجه دوشوندوکلری، یاشادیقلاری، مبارزه آپاردیقلاری و دایاندیقلاری ایله تانیشمیشیق.چکدیییم آدلارین بیرسیراسی گئچمیشده یاشیییب‌لار و بو زاماندا یاشیییب‌لارسادا اونلاری گؤزوموزله گؤرمه‌میشیک، اونا گؤره‌ده گرچکلی‌یینی اولدوغو کیمی دوشونه‌مه‌میشیک، بلکه بیر رومان کیمی اوخوموشوق، بلکه‌ده بئله حیس ائتمیشیک؛ اونلار بیر آیری دونیایا یا آیری زامانا آییددیرلر. نیله‌یه‌ک بئله ائشیدمیشیک “گؤز گؤردویونه اینانار”. آما من بو بؤیوک اینسانلاری درک ائتمک اوچون،بو آتالار سؤزونه دایاناراق “همدان اوزاق، کردی یاخین”، یاخین آدرس‌لر وئره‌جه‌یم. اونلاری دوشونمک، رومان کیمی دوشونجه‌دن چیخاردیب یاشاتماق اوچون، آمریکایا، گونئی آفریقایا گئتمک گره‌ک دئییل. بو اولو اینسانلاری گؤروب ، اونلارلا یاشاماق ایسته‌سه‌نیز قولاغیمیزین دیبینده،سعید بَی متین پور، حسن بی دمیرچی، محمود بی فضلی،عباس بی لسانی و … گؤره بیلرسینیز. اونلارین اؤزلری و یا آییله‌لری ایله گؤروشوب-تانیش اولساق، گؤره‌ریک کی رقیه خانیم نئجه اوچ اوشاغین نازین چکیردی، سونا خانیم ایله باریش خانیم ائوی گئچیندیره‌رک کؤرپه اوشاقلارینی دیشلرینده نئجه دولاندیریرلار، عطیه خانیم نئجه هر هفته یای-قیش تهران-زنگان یوللاریندا عؤمور چورودوبدور.بئله بیر دورومو گؤردوکده، بویوک اینسانلاری گؤزوموزون اؤنونده اولاراق اوزاقلاردا آراماریق. اومارام بو مقدمه ایله نه‌یی قصد ائتدیییمی یئتیره‌بیلمیشم. دوزدور سیزده منیم کیمی بو آغیر یوکون یالنیز عباس بی، سعید، حسن آغا، محمود بی، یوروش بی،… داشیردیغین، دوشونمورسونوز. بو بی‌لرین آرخاسیندا آسلان کیمی قادینلار دایانیبلار. اوشاقلارینا یاخشی بیر اویونجو کیمی هم آتا اولوبلار هم آنا، آتالاری‌نین نه اولدوقلارینی، نئجه یاشادیقلارینی هم اوشاقلارینا هم میللته یازی‌لاریله، دانیشیقلاریله، ایشلریله بیر کلام یاشاییشلاریله گؤرسه‌دیبلر. بئله‌لیکله نئچه قاتلیسیمیت دووارلار، کیلیدلی دمیر قاپیلار و خارلی حیصارلار اونلارین دوشونجه‌لرین توتانماییبلار. چونکو اونلارین یاری پارچالاری او حیصارلارین دیشیندا یاشیییر. اونلار بیر روحدورلار نئچه بدنده. نئجه اولور بو اینسانلار بیر-بیرین تاپیرلار، سانکی قابلاما دولانیب قاپاغین تاپیر!
عطیه خانیم طاهری، زامان-مکان قانونلارین بوتونونو پوزوبدور!! بونو آنلاماق اوچون سیزی بیر فرضی سوروشدورمایا کی راه و ترابری اداره‌سی یوللارین یاخشیلاشماغینا گؤره دوزنله‌میشدیر، دعوت ائدیرم.
(کیشی)مأمور: نئچه ایلدیر بو یولو گئدیب – گلیرسیز؟
عطیه خانیم: نئچه ایلدیر بو یولو گئدیب – گلمه‌ییمی یاخشی بیلمیرم آما اونو بیلیرم دئییرلر 2 ایل 6 آی 14 ده گرک گئدیب گه‌لم.
کیشی:باشا دوشمه‌دیم!!! ایکنجی سوال : یوللارین کیفیتی نئجه اولوبدور؟ دست انداز، چالا –چوله‌نی دئییرم ها آی باجی!
عطیه خانیم: سیز دئیه‌نی یاخشی باشا دوشمه‌دیم منی سعید دن آییرانی دئسه‌نیز، هه یاخشیلانیب‌دیر. آما کاش نه اولایدی او اوچ-دؤرد ده‌نه اصلی چالانیدا قالدیرسایدینیز.
کیشی: هانسی اوچ-دؤرد ده‌نه چالا؟ هاردادیرلار؟
عطیه خانیم: همان عوارضیلرده! نه زامان من سعیدیمله خلوت ائدیرم عوارضیلرده دورماق منی او باغلانتی‌دان آییریر. آما زنگانین عوارضی‌سی یوخ فرق ائدیر! منی داها آرتیق سعیدیمه باغلاییر. آخی بیزی یوزلر اینسان اوردا قارشیلاییب‌لار، قوربان کسیبلر. من نئجه اونودوم چونکو اوگونلر منیم عؤمرومدن ساییلمیر. سعید بی 8 آی آیریلیقدان سونرا منه و میللتینه قوووشموشدور.
کیشی: من یئنه باشا دوشمه‌دیم سیز نه دئییرسیز!!!
عطیه خانیم: مأمور بی منیم بیر سورغوم واردیر.
کیشی: بویورو
عطیه خانیم: هئچ بیلیرسینیز گئدن باش گلن باشدان چوخ قیسسا و چوح یاخیندیر؟
کیشی: آخی نئجه اولابیلر. بورا اتوباندیر. گئت باشی و گل باشی بیردیر!
عطیه خانیم: گئدنده سعیده قوووشماق اوچون زامان برق کیمی گئچیر، آما گلنده ایسه! هر بیر متر آییریلدیقجا زامان گئچمیر سانکی زامان دورور!
کیشی: باجی من سیزی آنلاماق اوچون نه گرکلی‌دیر گؤرهرم. من سعیدی، سیزی، دوشونجه‌نیزی تانیماق ایسته‌ییرم. من ایللر بویو یانیلمیشام. بو یوللاری یالنیز مادی مئتودلارلا اؤلچوله‌میشم. ایندی گؤرورم باشقا اؤلچولرده واریمیش!!! سعیدی، نئجه تانی‌یا بیله‌رم؟ سیزی، نئجه آنلایا بیله‌رم؟
گلین هامیمیز بو سورغویا جاواب تاپیب، یازاق، جاوابلاری پایلاشاق. نئجه بو آسلانلاری، اونوتمایاق؟ آسلانلارین یئرین چاققالارا وئرمه‌یک.
محمد عباس پور فوریه
