چاره میز-حمید منافی نادارلی
- توضیحات
- منتشر شده در دوشنبه, 28 بهمن 1392 03:54
دره دن دانیشیرام قورخورسان ” دره نین دومانی وار ، سئلی وار ” داغدان دانیشیرام قورخورسان “داغین اوچورومو وار ، قاری وار ” دره بیر یانا ، داغ بیر یانا ، یاشاییشدان دا دانیشیرام قورخورسان ، اؤزون بیل قارداش ! آمما آغیر درد دیر قورخوب یاشاماق…!
بلی , بو گونلر دردیمیز حتی یاشاییشدان دا قورخانلاردیر. یاشاییشدان قورخان دره دن ده قورخار , داغدان دا قورخار .
آما گؤرن بو قورخو دئیه بیر شئی هاردان قایناق لانیری !؟ .
منجه قورخو قارانلیقلارین ایچینده ن باشقالدیران بیر شئی دیر . یوخسا یولو و هدفی بللی اولان لارین دوردورولما ندنی نه اولا بیلر ؟! بیزیم یولوموزدا بللی دیر , هدفیمیزده .
بیز خوشبخت میللت لرین ایچینده اولماق ایسته ییریک . دونیادا خوشبخت میللت لرین همیشه اؤز اللری دئییلر , اؤز باشلاری . آما بو آرادا خوشبخت لیک , اویانان میللت لرین دیر و میللتیمیز اویانمایاجاق مگر میللت چی لریمیزین اویانسین. بو گون میللت چی لریمیز آغیر بیر یوخودا سئیر ائتمک ده دیرلر . ایشلر یا تعطیل اولوب یادا ایشله ین لر ی ایشلمه مزلیگه چاغیریرلار . بو گون منملیک میللت چی لریمیزی ائله باسیبدیر کی شرق روزنامه سینین تورک ژورنالیستی نیده دیله گتیریب دیر.
الیمیزده ذره جه شمع اولسادا منملیگیمیز اوچون ایشیق وئریر . دئیه ن یوخدور آی قارداش بو قارانلیقلاری قالدیرماق اوچون سن و من بیرلیکده نییه شمع اولوب اریمه یک گره ک ! ” سن یانماسان من یانماسام هانسی آلوولار ایشیق سالاجاق بو یول لارا . گلین بیز قارانلیقلاری قالدیرماغا جان آتاق ؛ اون دا گؤره ریک میللتیمیز سسیمیزه نئجه سس وئره جک.
مگر میللتیمیز بابک قالاسیندا – 85 اولایلاریندا – تیراختور مسئله سینده – قاراداغ دئپرمینده و اورمو گؤلونون اعتیراض لاریندا سسیمیزه سس وئرمه دیلر ؟ مگر بو میللت 88 ده سن و منه تای اؤزلرینی تئهران دان آیری تعریف لمه دیلر ؟
حسن دمیرچی دئمیشکن هر زامان میللت گوجه گلسه , تئهران دا دالی اوتوراجاق.
بو گون تورپاقلاریمیزی بیر طرفدن کوردلر باسیب گئدیری بیر طرفدن ده فارس لار و بو آچیق سوفرامیزدان حتی ارمنی لرده پایسیز قالمالاییب لار. ایندی بو گون گلین دوشک تورپاقلاریمیزی قورتارماغا . یوخ قارداش ! بختیار وهاب زاده دئمیشکن ” زورا تسلیم اولان تورپاق قایتاریلماز سؤز گوجونه ” . تاسف له بیزلر زورا تسلیم اولان لاردانیق و هئچ بعید ده دئییل اورتادوغونون بو گونکو فیرتیناسیندا باشقا بیر زورلادا اوزلشمه ییمیز اولسون . اؤزوموزو غورورلا گؤره رک کوردلره ده منطقه ده بیر گؤز دولاندیراق . سوریه ده خودمختار اولدولار – عیراق دا ( آذربایجانین تاریخی تورپاقلارینین اوستونده ) خودمختار اولدولار و تورکیه ده خودمختارلیق دان دا بیرآزجادا اویانا ! آذربایجانین تورپاقلارینا صاحاب دوراراق بیر تورک دئولتینی ده اؤزلری ایله یول بیر ائله دیلر . ایندی بو آرادا اورا بس دئییل کی هئچ باتی آذربایجانیمیزیدا آماج لاییب لار . تورکیه دن باتی آذربایجانیمیزی کوردوستان آدلاندیریرلار آما اوردا اولان یوزلرجه میللت چی لریمیزدن حتی بیر کیچیک اعتیراض سسی ده چیخماییر ( اولاری قیناماق ایسته میرم آما اولاردان اینتیضارسیزدا دئییلم ) . اعتیراض لار اینتئرنئتدن تکجه بیزه چاتدیریلیر . ائله بو اوزدن دیر کی ایران پارلئمانین دادا جرات تاپیب قوزئی کوردوستانین یارانما هوه سین اورتایا چیخاردیرلار . سانکی بو یوکون هامیسین ایچریده اولان لار تاشامالی دیرلار . تاشاماق دا ایسته ین زامان دئموکراتیک سیز لیگه موتتهم اولورلار . آماندیر ائله یوخ , بئله یوخ ایله اوزله شیرلر . گؤرن گلجک نسلیمیز بیزلر اوچون نئجه قیضاوته اوتوراجاق ؟ نییه منملیک آتیندان یئنمه یه دوشونمه ییرک نییه ؟.
قارداشیم ایندی اویانیش چاغی دیر . گلین اویانیش اوچون آتدیم لاریمیزی مؤحکم گؤتورک . اویانیش میللتییمیزی خییاوانلارا چکن بیر یول دور .اگر خییاوانلارا چیخماق و مئیدانی حرکت لردن قوللانماق یالنیش دیرسا , ندن اوکراینییادا خییاوانلارا چیخانلاردان حیمایت اولونور . جیسارتین آدینی حیماقت آدلاندیرانلار نییه اؤز نوسخه لرین اورتایا قویماییرلار . عئیبی یوخ اولار اولسون لار ارباب , بیزلر همیشه کیمی رعیت . واللاه بیز, وطن یولوندا رعیت اولماغی دا تپه دن دیرناغا سئویریک
. بونلاردان قیراق هئچ کیم نورمال یاشاییشینین لذت لرین بوراخیب زیندان لارا گئتمک ایستمز . حتی بیر گون زیندان چکن لرده یاخشی بیلیرلر نه دئییرم . آما بوندان باشقا نئیلمک ؟! . ائله بوردادیر کی ابراهیم جعفرزاده رحمتلیگین سون دانیشیغی اؤزون گؤسته ره بیلیر . ” موباریزه مئیدان لارینین اساس یئرلری خییاوان لاردادیر ” .
بلی! موباریزه مئیدان لارینین اساس یئرلری خییاوان لاردا اولماسا , قلم وورانلاریمیزین قلملری کسرلی اولماز , موسیقی اوجاقلاریمیزین اوجاقلاری همیشه لیک یانار اولماز , آذربایجانا قونداریلان مسئول لارین آغیزلاری جاواب وئریجی اولماز . دیشاریدا اولان فعال لاریمیزین لوبیلیک پوروسه لری دوز یئرینه یئتیرلمه ز.
اگرمئیدانی فضالاری بیزایستی ساخلایا بیلسک ؛ “گؤره ک نئجه دیلیمیز یاساق قالاجاق ؟ . گؤره ک نئجه معدن لریمیز تاراج اولاجاق ؟ . گؤره ک اورمو گؤلوموز نئجه نیجات تاپمایاجاق ؟ گؤره ک قاراباغین مسئله سی حل اولمامیش نئجه ارمنی مسئول لارینی آذربایجان گردیییه گتیره بیله جک لر ؟.
یقین بو مئیدان لارین چتین لیگی ده اولاجاق دیر هله بوندان باشقا جان وئرمگی ده اولاجاق دیر . ائله تورپاق اوچون دونیانین باشا باشیندا جان وئرمک طبیعی بیر شئی دیر . تاسف له بو گون بیر عیدده تورپاق مسئله سین چوخدا اؤنملی گؤرمه ییرلر !.
اولار اینسانییتی اوستون توتان لاردیرلار . اولارا حاق وئریرم آما یئر کوره سینده گلین بیر میللت تاپاق اینسانییت اوچون باشقا بیر میللتین آدینا بیر قاریش تورپاق قیراغا قویا بیلسین . ندن چین اؤز تورپاق لارین دان باشقا آیری میللت لرین تورپاق لارینی زورلاییب و بو قونودا هر اعتیراض سسینی بوغمادا ساخلاییر . ندن آمریکا دا قیزیل دریلرین باشینا ایتین اویونون گتیریب لر ؟ ( تورپاق مسئله سیندن قیراق نه اولا بیلر؟! ) . نده¬ ن روسیه اؤلکه سی اورتا آسیادان نفسینی چکمک ایستیینده سانکی جانی چیخماق ایسته ییر . ندن ؟
سؤزومون سونونو بیر سورون و بیر جاوابلا بیتیرمک ایسته ییرم :
گؤره ک چاره میز اورتادا اولان فیرتینالار اوچون نه اولا بیلر ؟
منجه چاره میز اویانیش دان کئچیر . اویانیش بیزیم سیلاحیمیزدیر . نه قدر اویانیش چوخالسا او قدرده سیلاح لاناجاییق بیز . اویانان هر بیر میللت الینه وورولان زنجیرلری پرستیش ائتمه یجک کی هئچ اولاری قیرماغادا هر آن جان دا آتاجاق . اویانمیش میللت تورپاقلارینین قاریش – قاریشنا بیله ¬رک و کؤنوللو اولاراق قوروقچودا اولاجاقدیر
