ایکینجی سویوق ساواشین باشلانغیجی- آسلان سولطانی
- توضیحات
- منتشر شده در یکشنبه, 11 اسفند 1392 20:16
۲۰۰۸جی ایلین یای آیلارین‌دا پوتین روسییه‌سی قافقازین درین‌لیک‌لرینه ایلرله‌یهن‌ده کیم‌سه یئنی بیر سویوق ساواشین روس‌لار طرفین‌دن باشلاناجاغینی زنن ائتمیردی. بیر نئچه گونلوک برابر اولمایان ساواش‌لاردان سونرا روس ایشغال‌چی اوردوسو گورجوستانین باشکهن‌دی تیف‌لی‌سه بیر نئچه کیلومئتر قالان دایاندیریل‌دی. باتی دونیاسی و آبد (آمئریکا) بو آرادا دانیلماز رول اویناییردی.
محض 17 ایل اؤنجه پارچالارا آیریلمیش اولان سسسب (شوروی) بیر داها اؤز داغیدیجی، قول‌دور و سؤمورگه‌چی اوزونو اورتایا قویموش و گورجوستان‌دان ایکی پارچا آییرماقلا یئنی بیر دؤنهمین باشلانغیجینی ایشارت ائتمیش‌دیر.
آیلار سونرا یعنی دئکابر (دئی آیی) ۲۰۰۸ ده آبد یئنی دؤولتی ایشه باشلادیق‌دان سونرا دونیا ائکونومی کریزینه گیرمیش ایدی. بو اقتصادی بحران‌دان ان چوخ زرر چکهن اؤلکرلر آراسین‌دا روسییانین اولماغی هئچ ده تصادفی دئییل‌دی.
زامان ایلرلدیکجه و بو بحرانین ایلکین زربه‌لری دف ائدیلدیکجه بو اسگی و یئنیجه یوخودان آییلمیش اولان آیی اؤز یارالارینی سارمیش و یئنی اوولار آراماغا چیخمیش‌دیر. ایل ۲۰۱۴ ا گلدیک‌ده ایسه آرتیق یئنی بیر دؤورون یارانماسی گؤز‌لر اؤنونه سریلمیش‌دیر.
آمئریکا باش‌دا اولماق اوزره بوتون باتی دونیاسی بلکه‌ده الدهن گئتمیش فورصت‌لر، سورییه‌ده گؤستردیک‌لری زییف‌لیک و یومشاقلیغین نه قدر ته‌لیکله اولا بیلجیی گؤرمه‌یه باشیامیش‌لار. اسگی تورک یوردو اولان کریم دونیانین گؤزو اؤنون‌ده آرتیق یاواش یاواش روس آیی‌سینین پنجه‌سینه دوشمک‌ده‌دیر. اوکراینا ایسه یئنیجه یاپدیغی دئوریمین دادینی چیخاردا بیلمه‌یه‌جک قدر چاره‌سیز‌دیر. یئنی اسگی هامام اسهی تاس! یئنی اسگی دونیا قای‌دالاری، یئنه سلاح و گوجون قول‌دور روس باش‌چی‌لارینین علینه دوشمه‌سی و یئنه‌ده چاره‌سیز قالان اینسان حاق‌لاری ساوونوجولاری. دئمک گوجون وارسا باشقاسینین یوردونو ایشغال ائده بیلیب و سیریتا سیریتا دونیانین تججوبلنمیش اوزونه باخا بیلرسهن. دئمک سلاح ایله سوله چوخ یاخین آرخاداشمیش‌لار. روس قولدوریزمی کریما سلاحلا سوله گتیرجکمیش، بئله دئییردیلر.
اینانماق ایستهمیرم آما هزین بیر سس چوخ یاخین‌دا ایکینجی سویوق ساواشین باشلاناجاغینی قولاق‌لارا فیسیلداییر. یئنه ایکی گوج آراسین‌دا ازیلهن میللت‌لرین هزین هیچقیریق‌لاری قولاغی کار ائد‌جک قدر اوجالیر.
بو اویونون سونون‌دا یا تاریخ بیر داها تکرار اولاجاق و روس ایکی باش‌لی یاش‌لی قارتالی یئلک‌لرینی یولوخ‌دوراجاق، یادا بؤلگه‌ده و دونیادا کاوس و دهشت حاکم اولاجاق. باخالیم و گؤرلیم آرخاداش‌لار.
آسلان سولطانی-استکهلم
