کیمه اینانماق اولار؟!
- توضیحات
- منتشر شده در شنبه, 09 فروردين 1393 23:45
سون اوکراین حادیثه لری نه قده ر اوزوجو اولسادا دونیامیزین رئالیقلارینی گوزلر اونونه سرگی له میشدیر. بو بیر داها بونو گوستریرکی ، اورسیت حاکمییتلری هئچ بیر بئین الخالق قانون و قایدالارا ده یه ر وئرمیرلر ، هنوز15ـ 17 نجی یوز ایللرین ایشغالچی لیق خصوصییتلری داشیماقدان ، یاخود سوویئت ایمپئریاسی یاراتماق ذئهنیتینده ن ال گوتورمه میشلر. یعنی مدنی بیر اینسان کیمی باشقالارینا ، توپراقلارینا ، آزادلیقلارینا حورمت قویماغی ، باشقالارینیدا اوز سوییه لرینده گورمه یی اویره نمه میشلر. و اویره نمکده ایسته میرلر. 21 ـ نجی یوز ایلده تاریخه قووشموش سوویئت ایمپئرییاسی رویالاریندا یاشاییرلار. بو رویالارینی حیاتا کئچیرمک اوچون هئچ بیر شئیده ن ، حتا یئنی بیر دونیا ساواشیندان دا چکین میرلر. و ساواش تبلی چالیرلار. بو اورسیت قونشولوغوندا اولان اولکه لر اوچون یاخشی بیر خبردارلیق دئییلدیر. بوندان سونرابو میللتلر داها آرییق حاضیرلیقلی اولمالیدیرلار. چونکی بو قاراباغ ،چه چه نیستان و آپغازییا دان سونرا روسلارین دوردونجو ایشغالچی کاراکتئرینی گوسترمکده دیر.
غربه گلدیکده ، اونلار اینسان حاقلاریندان ، حق دن ـ عدالتده ن دانیشیب ، آزاد دونیانین باشچیسی اولدوقلاری ایدعاسیندا ائتسه لرده ، عملده اوز چیخارلاریندان باشقا بیر شئی دوشونمورلر. یعنی دئدیکلری ، عمللریله باغداشمیر. آمئریکالیلار اسکی گوجلرینی ایتیریب ، ساواشدان یورولموشلار. بونو دیکتاتور پوتین جنابلاریدا درک ائتمیشدیر.
آمئریکا و غربین سورییه ، ایران، قاراباغ ،چه چه نیستان و آپغازییا مسئله سینده اوروسلارا تعویض وئرمه لری ، غربین گوجولویونو یوخ ، ضعفینی نوماییش ائتدیرمیشدیر. بونا علاوه اولاراق غربین رئاکسیالاریندان بئله بیر اینتبا یارانیرکی ، اونلار مسیحی دینینده اولانلارا داها چوخ رغبت بسله ییرلر. بونا بیز قافقازدا شاهید اولدوق. اونلار ائرمنیلرین ـ روسلارلا بیرلیکده آذربایجان اراضیلری نین ایشغالینا چوخ جیدی یاناشمادیلار و یاناشمیرلار. چه چه نیستان میللتی اوز مستقیللی یی اوغروندا ساواشدیقدا غربلی لر اونلاری حمایت ائتمه دیلر. آمما گورجوستان حمایت اولوندی. اراضی سی آذربایجان و اوکرایین ده اولدوغو کیمی بولونسه ده حاکمیتی ساخلاماغا چالیشدیلار. ایندی هامان حادیثه لر اوکرایین ده جریان ائدیر. آمما غربین بوگونکو یاریمچیلیق حمایت لری اوز ایقتیصادی چیخارلارینی دوشونمه لری اوروسلارین سون سالدیرقانلیغی نا سبب اولموشدور. بونو غربیده یاشامیش پوتین ده یاخشی بیلیر.. بوگونون عکسینه خورشچوف دوورونده بئرلین حادیثه لرینده اوروس تانکیلاری نین قارشی سیندا آمئریکا اوز تانکیلارینی گتیریب دوزمه سی ، یعنی غربین کسین چیخیش ائتمه سی اوروس تانکیلارینین چکیلمه سینه سبب اولدو. ائله چه ده خوروشچوفون کوبایا آتوم راکئت لرینی یئرلشدیرمک ایسته دیغی زامان آمریکا وغربین عکس العمللری بونا مانع اولدو و اوروسلاری اوز یئرینده اوتوردو. تاسوفله بونا اوخشار بیر گوج نوماییشی قاراده نیزده اوروس گمی لری نین قارشی سیندا حیاتا کئچیریلمه دی. اوروسلار راحاتلیقلا تاتارلارا عایید اولان و بوگون اوکرایین نین بیر پارچاسی اولان کیریم یاریم آداسینا صاحیب چیخدیلار. غربین ان بویوک گوردوغو ایش 30 نفرین آوروپادا اولان بانک حئسابلارینای دوندورماق اولدو. گورونور کی غرب او کسکین لی یینی ایتیرمیشدیر. یالنیز دوشونولن سئی چوخ کار الده ائتمک دیر. مئرچ آی نین 26 سیندا اوباما بروکسئل ده اوروسلارا قارشی آمیارقوندان دانیشدیغی آندا، آلمانین زیمئنس کارخاناسی نین رئیسی دیکتاتور و جینایتکار پوتین له اوتوروب سورعتلی تیره نلرین ساتیشی حاقدا معامله ائدیردی .
باشقا بیر میثال قورباچوف آذربایجاندا ، بالتیک اولکه لرینده جینایت ایشله ییب قان توکسه ده ، آلمانین بیرلشمه سینه راضیلیق وئردییی اوچون اونا باریش موکافاتی باغیشلادیلار. ائله پوتین ده اوز توپ ـ تانکلاری ایله چه چه نیستانی داغیدیب ، بیر میللتی یوخ ائتمه یه قالخسادا غربلیلر اونونلا لاس ووروب ، آلمانین کئچمیش باش ناظیری شیرودئر اونو بویوک دئموکرات آدلاندیریب ، اونا دئموکراتیک شکیلده سئچیلمیش آلمان پارلئمئنتوسوندا چیخیش ائتمه یه ایجازه وئرمیشدیر. بوگون .آوروس مافیاسی روس میللتین پولونو بوتون غرب اولکه لری نین بانکالارینا دولدوروب ، هامسی نئچه میلیونلوث ویلالارا صاحیبدیرلر. گورونورکی غربین اینسان حاقیندا بویوک ایدعالاری دا ده یه رسیز ایدعالاردیر. غربین آغزینی اوخویان اوروسلار کئچه ن بو 20 ایلده اوز بیلدیکلرینی ائدیرلر. باشقا سوزله دئسک بو غربین چیخارچی لیق سیاستی نین نتیجه سیدیر.
عکسینه غربلی لر قاراباغ ، چه چه نیستان و آپغازییا مسئله سینده اوروسلارا گذشته گئتمه سئیدیلر .شاید اوکرایین مسئله سی اورتایا چیخمازدی. و بوگونده اکر غربیلیلر بوتون ساواش گمی لرینی قاراده نیزه گونده ریب گوج نوماییش ائتدیرسئیدیلر و اوروسلاردان دالی چکیلمه لرینی ایسته سئیدیلر. پوتین نین بئله ایشغالچلیغا ال وورماسی چتین اولاردی. بوتون بو اولوب کئچن لر دوشوندوروجو مسئله لردن دیر. غربه تام اینانیب بئل باغلاماق اولماز
بوناگوره ده میللتلر اوزلری اوز طالع لرینی دوشونمه لیدیرلر. کیمسه ده ن اوموب ـ کوسمه مه لیدیرلر. چاغیمیزین واقعیتی چیخار داواسیدیر. هاردا داها چوخ چیخار اولورسا غرب و باشقالاری اوچون اورادا داها اوئریشلی یدر. بو چیخارچیلیق مئیدانیندا حاقا ـ عدالته ، میللتلرین اوز طالع لرینی اوزلری نین تعیین ائتمه کیمی ده یه رلره ، حاقلارا یئر یوخدور.
آنادیلی غزئته سی
دوقتور غروی
