یانار موعللیمین گؤروشونده، سایین‌قالا
- توضیحات
- منتشر شده در شنبه, 09 فروردين 1393 23:59
ائلیمین، دیلیمین اوجادیر باشی سوراسان عؤمرونو دولودور یاشی
دده قورقوت سؤزون آنیبدیر ائلیم اوجادیر اردمیم، گوجلودور سئلیم
"صاباحا ساری"- بیر قوجاق سئوگی کیتابیندان
یانار موعللیمین گؤروشونه، سایین‌قالایا گئتدیک آخی ائلین دردیندن ساچلاری آغارمیش شاعیرین سؤزلرینی ائشیتمک، باشقا بیر دادی وار. بلکه اونسوز بو شهرده ادبی درنک‌لری گؤرمک مومکون اولمایایدی. محمد سعید افضلی، سایین‌قالالی مجنون تخلص ایله تانینیب "بیر قوجاق سئوگی" آدلی کیتابیندا وطن، سئوگی، حسرت و آرزو مضمون‌لاریندان سؤز آچاراق اورکلری اوخشاییر. یانار موعللیم، "محمد رحمانی‌فر"- ین یئنی چاپ اولونموش " شهریارلا بیرلیکده اؤزگه‌لشمه‌دن اؤزلشمه‌یه دوغرو" کیتابیندا، شهریارین فارسجا شعرلرینی تورکجه‌میزه چئویریب‌دیر.
دوشونجه‌نین یارانماغی هرنه‌دن اؤنملی دیر و او بونو یاخشی بیلدیگی اوچون الیندن گله‌نی اسیرگه‌میر. بایراملیغا دوشونجه پای وئرسین دئیه ائوینده بیر قوجاق کیتاب آلمیشدی. بئله بیر درین دوشونجه‌یه یییه اولدوغوندان دولایی ائله شهرده ده بؤیوک حؤرمت قازانمیش.
بایرام گون‌لرینده دوستلارلا بیرلیکده یانار موعللیمین چالیشمالارینی یاد ائتمک اوچون بو دیرلی شاعیریمیزین گؤروشونه گئتدیک.
محمد سعید افضلی جینابلاریندان بیر پارچا شعر:
یالنیز سنی
جهد قیلدیم سیرریمی جان ایچره پنهان ائیله‌ییم
یوخ، گره‌ک دیر دردیمی معشوقه عنوان ائیله‌ییم
هر نه واریمدیر آلیبدیر عشق یالنیز بیر سنی-
آلماسین، بو التماسیمدیر، کی امکان ائیله‌ییم
ناله‌ی زاریمدان آخر گؤز شکایت باشلاییب
سؤیله ییر قلبیم: گره‌ک دیر رودو عممان ائیله‌ییم
آتش عشقیندن ای جانان، ساقینماق فیکری یوخ
وار دیلک کیم اودلانیب بو جانی سوزان ائیله‌ییم
قهر و لطف عاشیقلره بیر دیر تفاوت ائیله‌مز
لطف قیل یا قهر کیم بو جانی قوربان ائیله‌ییم
دانلاییرلار ال گؤتور بسیدیر، نه دیر مجنون بو عشق
نئیله‌ییم اینجار یوخ، کافر مسلمان ائیله‌ییم
