ماحمید زنگ آچمیشدی
- توضیحات
- منتشر شده در دوشنبه, 18 فروردين 1393 21:20
وئریب لر مخدره بندینه. سوروشدوم نولوب ددی رییس زیندانینان سوزلشمیشم. تانییرم بیله سین بیلرم کی حتمن بیر اعتراض ائلییب و اودا پیس دانیشیب و ماحمید دا جاوابین وئریب اونا آغیر گلیب. دییردی اوزون کی بیلرسن من چکه بیلمرم بیزه توهین ائلسین لر ایندی فرق ائلمز زیندان اولا یا ائشیه...
شنبه قراریدی باریش گئده ماحمیدین ملاقاتینا. اولمادی... بایرام نان سونرا ایلک گوروش لری اولاجایدی...اولمادی آخی بیزیم بو رییس زیندانیمیز نه بیلر کی... کیم بیلیر کی اودا بیلسین
بیر سری باریش دییردی آتیلانی آپارمیرام ماحمیدین ملاقاتینا. باریش، آتیلادان گیزلی گئدیر ماحمیدین ملاقاتینا. دییردی آتیلا هر سری ملاقاتدان دونور بیر هفته مریض اولور، اذیت اولور، بهانه توتور
تبریز زیندانیندا حضوری ملاقات لاری ییغشدیریب لار ایندی فقط کابینی ملاقات اولور. آتیلا مجبوردی آتاسین شوشه لرین دالیسینان گورسون، سسین تیلفونان ائشیتسین. بودا اونلارین پایی بو دونیادان
آتیلا آتاسینین قوجاغینا حسرت قالیب و ماحمید آتیلانی قوجاغلاماغا حسرت. نه اوپه بیله جک نه ال لرین ال لرینه توتا بیله جک. اینانا بیلمیرم بو حسرت قراردی 9 ایل چکه.اینانا بیلمیرم
بو 9 ایل بیر شوشه دالیسندا گئچه جک گوروش لری. هامان شوشه لر کی قویمور ال لری بیر بیرینه چاتسین و بیر سس کی تیلفون دالیسنان گلیر.
باریش دییردی آتیلا چوخ داریخیر آتاسینا ایستیرم ایجازه وئرسلر یولیه م زیندانا بیر نئچه گون قالسین آتاسینین یانیندا بئلکه بو داریخمالاری قوتاردی. بیر لحظه دوندوم بو سوزدن سونرا آتیلانین داریخما داواسی زیندان دی
یادیما گلدی ماحمید بیر سری ملاقات دان قئیتدی بنده. توتقونیدی. آتیلا آغلامیشدی بتر آغلامیشدی سیگار ایسته دی گئتدیک اوتوردوق حیاطین بیر طرفینده سیگارلاشدیق یئره باخیردی
سیگار قوتولدی ماحمید...
89 یادیما گلیر ایلک گوروشموز زیندانان سونرا. بتر ماحمیدا دارخمیشدیم زنگ وئردیم و بیر قرار قویدوق. ماحمید ددی آتیلا منن آیری توشمور اونودا گئتیره جاغام قرار اولدی بیر پارک دا گوروشک. ماحمید یئتیردی آتیلا قوجاغیندایدی. سیخیلمیشدی ماحمیدین قوجاغینا و آیریلماق بیلمیردی. سئونیجی گوزلرینن اوخوماق اولوردی. گولوش لو دوداق لارینان. بیر آن آتیلا ماحمیدین قوجاغینان توشدو قاچا قاچا گئتدی پارکین بیر طرفینده اویونجاق اولان یئره من و ماحمید آتدیم لیردیق
بیراز آتیلادان فاصیله آچدیق بیر دیقه گئچمه میشدی که آتیلانین آغلاماق سسینه دوندوق آتلا گورموشدو آتاسی اوزاقلاشیر آغلیه آغلیه قاچیردی آتانین طرفینه. ماحمید گوزلرین سیلدی آلدی قوجاغینا ددی:"آتیلا اوغلوم بیز کی بیر یئره گئتمیردیق ائله بیردا آتدیم لیردیق نیه آغلیرسان؟"
آتبلا ددی "او سری ده گئدنده ددین بیز بیر یئره گئتمیریق کی بیرداییق..."
سیگار قوتولدی
