دوه قوشو!- محمد احمدی زاده
- توضیحات
- منتشر شده در پنج شنبه, 05 تیر 1393 12:52
دوه قوشو، بیر جور قوشدورکی، یوخ اوزور دیله ییرم، بیر جور دوه دیر کی اومم م م م م م . منجه بو قونو دان واز گئچسک یاخشی اولار، چونکی هئچ من ده، دوه قوشونون نه اولدوغونو بیلمیرم. آمما یومورتادان چیخدیغندان دولایی، ان آزیندان کیچیک یاشلاریندا بیر قوش اولدوغونا داییر هر کسده بیلگیلر وار.
هر حالدا دوه قوشو ایرانین گونئی آذربایجانیندا یاشایان بیر جانلیدیرکی بو بؤلگه ده یاواش یاواش بؤیویوب و اؤزونو بیر دوه کیمی گؤسترمه جان آتار و اؤزونون نه اولدوغو هئچ بئجینه اولماز، یالنیز آماجی دوه اولماقدیر والسسلام، آمما گئنه، نه قدرده چالیشسا دوه قوشو اولماق دان اؤتری گئده بیلمز و بو ندنله، داها دا چوخ دوه لنمه یی اوچون و یاغلی دوه یئمکلره صاحابلانماغا گؤره، ایرانین دیگر یئرلرینه کؤچ ائدر.
بو جانلینین بعضیلری کوچه بازاردا بؤیویر، اونا گؤره ده کیتاب و مدرسه دن بیر شئی قانماز و بؤیودوکدن سونرا اؤزونو گؤسترمک اوچون قلم، کاغیذ قوللانا بیلمز و بو سببله باشقا بیر شئیلرله اؤزونو مشقول ائدر، مثلن گئدر فوتبول اوینار و دوه لرین میللی تاخیمیندا، "ایفتیخار دوه" گؤسترجه سی اولار و دوه لرین داهادا بویونلارینین دیکلمه سینه یاردیم ائدر. نه ائدسین یازیق بو دوه قوشو، ساوادی یوخ، کوچه ده بؤیوموش، هئچ بیر شئیدن خبری یوخ، خبری اولسادا بئله آنلاماز گلیب گئدنلردن، بیزیم بو ساوادسیز دوه قوشو. سیزلرده اونو چوخ قینامایین.
آمما بعضی دوه قوشلاریدا واردیلارکی، یامان درس اوخویارلار و بؤیویوب سونوندا دوه دیلینده کیتابلار یازارلار و بو دیلین اینکیشافیندا و گلیشمه سینده دیرلی بیر رول اوینارلار و تازا یومورتادان چیخان قوش بالالارینین دوه لنمه لرینده یاردیمجی اولارلار. بو نوع دوه قوشلاری یاشلاناندان سونرا و قارینلاری دوه یئمه ییندن دویاندان سونرا، تازا او زامان اؤزلرینین او اونودولموش قوش دیللری یادلارینا دوشر، و ایش ایشدن گئچیب و سسلری باتاندان سونرا هارای سالارلار: آی منیم قوش دیلیم، هانی منیم قوش دیلیم.
یامان بیر جانلیدیر دوه قوشو ، بتردن قاچار، گؤزل یازار و حتتا اوجادان اوخویار هم ده قوشلار دییاریندا کونسئرت صحنه سینده: ای دوه لر اؤلکه سی ای مرز پر کهن
