سیسقا گئده و محلله میزین گؤزل قیزلاری- محمد احمدی زاده
- توضیحات
- منتشر شده در پنج شنبه, 24 مهر 1393 02:33
اسکی فیلم لرده بیر دوزسوز صحنه واریدی، و او گونلرده چوخلو مود اولموشدو او صحنه نین حکایه سی. بیلمیرم ندنسه بو گون بیر آن او یادیما دوشدو.
بیر محلله و او محلله ده ده، آریق سیسقا، گوجسوز گئنج بیر اوغلان اولاردی و طبیعی کی ده بیر گوزل قیز. ائشگک له هئلیکوپتر آراسیندا نه قدر فرق وار، ائله بیر او قدر ده او سیسقایلا، قیزین آراسیندا اولاردی. قیز اوغلانی سایمازدی کی هئچ، اونو آدام یئرینه بئله قویماز ایدی. آمما مگر اوغلان ال چکردی. هر اویونو واریدی چیخارداردی بلکی بیر تهر، قیزلا دوست اولسون و اونا صاحاب چیخسین. سیسقا جیلازین، الی هر یئردن کی اوزولردی، بیر آن آغلینا بیر فیکیر گلردی. گئدردی محلله نین ان زوربا گئده سینی تاپاردی. زوربا گئده، ائله بیریسی ایدی کی محلله نین جاوانلاری اونو گورجک اؤزلرینی باتیراردیلار و اونا قارشی کیمسه دایانا بیلمزدی. خولاصه، فیلم ده کی سیسقا اونونلا بیر آنلاشما ائلردی. اونا بیر آز پول وئرردی یا دا، بیر پاکت سیگار، اودا گئدردی بحث ائتدیگیمیز گوزل قیزین، یولونون اوستونده دوروب اونو گؤزلردی. قیز گلیب قارشیسیندان گئچرکن، اونون یولونو کسیب و اونا ساتاشاردی. بو آندا سیسقا اوغلان، اسکی دن قوردوغو پیلانا گؤره میدانا آتیلاردی و زوربا قورخونج گئده نین، بیر یوموروق انگیندن، بیر تپیک بلیندن ووروب، اونو یئره سره لردی و سونرا زوربا گئده، یئریندن قالخیب و گویا قورخوسوندان توو دابانا دئییب، اورتالیقدان قاچاردی. سیسقا و زوربا گئده، ایکیسی ده روللارینی اوقدر ایناندیریجی اویناردیلار کی اطرافدا کی اونلاری ایزله ین هر کس، سیسقانین جسارتینی و قهرامانلیغینی آلقیشلاردیلار. بئله سینه فیلم ده کی سیسقا جیلاز اوغلان، قیزین ایلگیسینی چکیب و یاواش- یاواش اونونلا دوستلوغونو قوروب و سونوندا دا، قیزا صاحاب چیخاردی.
آمما او اسکی دوزسوز فیلم لرین، یئنی وئرسیاسیندا کی اولان بیزیم بو ایندی کی سیسقا جیلازین، بیلمیرم ندن گؤزو هئچ ده دویمور؟ اوزونه ایشید (داعش) آدیندا زوربا و قورخونج بیر گئده تاپیب و اونونلا آنلاشیب، یالانجی ساواشلاریندا اونو قووالیر و بیر قهرمان اولاراق، محلله نین بوتون قیزلارینا صاحاب چیخیر، موصلی، کرکوکو، تلعفری و کوبانی یی اؤزونه گؤتورور. هله ده گؤزو دویمور بو سیسقانین، گؤزونو تیکیب محلله نین دیگر گؤزللرینه، وانا، ارزروما، بیزیم آذربایجانیمیزن گؤزللری تبریزه، اورمیه یه. گؤره سن نه زامان قیزلارمیزدان ال چگه جک بویوک کوردوستان هوسینده اولان فیلیم ده کی بو ساپیق.
