تزه یارپاق"- ماحمود دالغا
- توضیحات
- منتشر شده در چهارشنبه, 27 خرداد 1394 00:41
یئری - گووی توزلی دومان آلمیشدی. نفس یارپاقلارین بوغازین سیخیردی.ثانیه لرچوخ یامان کئچیردی.بیر تزه آچیلمیش یاشیل یارپاق اؤز رویالاریندا دنیز قیراغیندان سئیر و سفره باشلامیشدی. بیر ایلدیریم شاخماسی اونو خیال لاردان چیخاردی.
جینقلی یاشیل یارپاق باشین دایادی یانینداکی یارپاغا ، توزدان گؤزلری آچیلمیردی، اورگی سخینمادایدی،قورخا- قورخا سوروشدو:
- بو نه ایدی شاقیلدادی؟ بوکورولتولار ندی؟
یئکه یارپاق زورلار گولدی، دوداقلارین تورپاق توتموشدور.قوروموش دوداقلاری چارتدامیشدی، الین چکدی تزه یارپاغین باشینا دئدی:
- قورخما بو ایلدیریمدی، بو سس ده گووی کورولتوسیدی، بونولار یاغیش یاغمانین نیشانه لریدی ، یاغیش
یاغسا بو توزلار گئدر، بیزیم نفسیمیز آچیلار، رنگیمیز یاشیل لاشار.
تزه یارپاق سئوینه – سئوینه باشین قویدو یئکه یارپاغین قولونا و گؤزلرین یومدو. گویده، شاقیلتی و کورولتور ساغ – سولا گئدیردی. توزلار فیریلتی ایله آغاجلاری آراسینان کئچیردیلر.یارپاقلارین رنگی سارالمیشدی، توزلاشمیشدی، یاشیللیق اؤزلریندن ایتمیشدی، بیر ایکی یاغیش داملا – داملا یئره دوشدو، بو داملالاردان بیریسی دوشدو تزه یارپاغین بوغازینان دالیسیجا توز گلدی، تزه یارپاق بوغولدو، نفسی باتدی، آمما یاغیش یاغمادی، یاشیللیق آداملارین خاطره سینده قالدی.
