Warning
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • Error loading component: com_content, Component not found.
  • Error loading library: joomla, Library not found.
  • Error loading library: joomla, Library not found.
  • Error loading library: joomla, Library not found.
  • Error loading component: com_content, Component not found.
  • Error loading component: com_content, Component not found.

آرزو- درویش اوغلو

عنّاغي ايله بيرليكده سابيل امير مئيدانيندا مچیدين دووارينين ديبينده چوللاريميزي آلتيميزا قويوب  اوتورموشدوق. گون اورتادان سونرانين ايسدي گونشي بير اؤنجه كي گئجه ياغميش قاري اريتميشدي. مچيدين گونئي دووارينين ديبي  گونون ايسديسينين آلتيندا حامام كيمي ايدي. باهارين ياخين اولدوغونو حیسّ ائدن اركك گؤگرچينلر ميدانين اورتاسيندا دَن ييغاركن قورقورقور ائدرك اؤز دؤره لرينه فيرلانيرديلار. يئردن چيخان بوخار آسفالتين گونون  آلتيندا قيزيشديغيني گؤسته ريردي. گون اورتادان قاباق سويوق ايدي. قورو يئميشچي(خشكبارچي) حاجي يدالله نين خورمالارني ميداندا دوران كاميوندان بوشالديب، ده وه چي بازارينين اورتاسينا ياخين اولان آنبارينا جان داليميزدا داشيميشديق. بازارا اَل داشقاسي ايله گيرمك اولمور كي. عنّاغي ماشاالله جاواندير، قيرخ-اللي كيلولوق قوطولارين ايكيسيني بير آراردا دالينا چاتيب، مندن بيرآدديم قاباقدا گئدير. منيم او گونلريم سووشوب. اونون بير يولدا آپارديغي يوكو ايكي سفرده بئله چتين آپاريرام. بيرده، كئچن ايل پاييزدا او ايت اوغلو ايت ایپليكچي يوسوفا ايشله ديگيمده، اینصافسيزين بالاسي قوجامان ايپليك يوكونو كروانسارانين سكگي سيندن بيراخيب، بئليمين اوستونه سالدي. بئليم سپدي. اولدوغوم يئرده  ده وه كيمي خيخديم، قالديم. بير ساعات نفسيم بوغولدو. اؤلوملره گئديب، گلديكدن سونرا اؤزومه گليب، زور ايله آياغا قالخديم. دؤرد ال آياق، دووارلاردان توتا-توتا اؤزومو چاي قيراغينا يئتيرديم. ايتين قودوغو بير قيران پول دا وئرمدي. دوداغيني بوزوب “ممد تاغي عمي سن گئت زعفران داشي، ايپليك يوكو سنه آغيردير” دئدي.
ساغ اولسون قورويئميشچي حاجي يدالله بوگون سحر عنّاغي يا يوز تومن، منه ده يئتميش تومن وئردي. الله بركت وئرسين. كيشي اینصافلي آدام دير. عناغي نين قاباقدا خير ايشي اولدوغونو بيلديگيندن اونا اوتوز تومن ده آرتيق وئردي. حلالي اولسون، جوان ايشه يوغوق دور. ايشدن قاچماز. من ده او ياشلاردا ايكن اونون كيمي گوجلو- قووتلي ايديم. دورمادان ايشلرديم، يورولماق بيلمزديم. گلجگيم اوچون مين بير خيال قورارديم. پوللاريمي ييغيب، بير تاكسي بار آلماق اومودوندا گئجه گوندوز ايش داليسيیجان قاچارديم. ايندي اونون اورگيندن کئچنلري من بيليرم. يالنيز جاني سابيل امير مئيدانيندا، منيم يانيمدا گونشلنير. روحو سردري ده آداخليسينين يانيندادير.
بئينيمدن کئچن فيكيرلري اوخويور كيمي گولومسه يه رك دورتمه ايله بؤيرومه ووردو. “ممد تاغي ماشاالله اؤز اؤزووه گول كيمي آچيليرسان، خير اولا، جوانليغیني خاطرلاييرسان؟” دئدي. فيكريمدن کئچنلري اوندان گيزلتمگه هئچ گرك يوخ ايدي. آنجاق آيري بير سؤز آغزيما گلدي. دئديم “غنّاغي بيليرسن، دئييرم اینشاالله ايندي بير كاميون يوك گلر، سن ايله من ده مئيداندا تكيك، باشا ايكي داشقا تره بار مئيدانينين داليسيناجان يوك چكريك، ايكي-اوچ يوز تومن تاپيپ، قويوب، گئدريك ائوه.”
بايرام قاباغينين گون اورتادان سونراسينين ايسدي گونشي عنّاغينين جانينا ايشله ييب، تنبللشديرميشدي. گؤيلو هئچ ايشلمك ايسته ميردي سانكي. آلتينداكي چولونو بيرآز قاباغا چكيب، كورگيني مچیدين كرپيچ دووارينا وئردي. سغه لريني كسيب، قيسسالتديغي سرباز پوتونلارينين باغيني آچيب چيخارداركن “دور آياقلاريم بير آز هاوالانسين” ديل-دوداغي آراسيندا ميريلداندي.  قوللاريني باشينين داليندا حلقه له ييب، دووارا سؤوكنه رك “من بير چورت وورورام، كاميون گلنده مني ده اوياندير” دئدي.
دوغرودان يوخلاماق ايسته مه ديگيني بيليرديم. گؤزلريني يوموب، خيیاليندا سردري يه گتمك ايسته ييردي. بايرامدان سونرا سردري ده اكين ايشي، باغ-باغات ايشي، باشلاياجاق. اوندان سونرا عنّاغي نين سابيل اميرده نه ايشي وار؟ سردري ده بئل بئلله مه گه، توخوم اكمگه ، بيجارا، پامادور شيتيلي اكيب-سووارماغا، كاهي درمگه گئدجك. بيجاردا، يوخسا پامادور شيتيلي اكمكده آداخلي سينا ياخين گليب، اونا قيش بويو تبريزده ايشلركن باشيندان کئچن خاطره لريندن دئيه جك. يوخلاماديغيني، خیياليندا بئله بير گونه ساري قانادلانديغيني يوموق كيپريكلرينين آلتيندا گؤزلرينين حركتيندن اولدوغو كيمي نفسينين قيسيق و ياواش گليب-گئتديگيندن اوخويوردوم. “قانادلان، قانادلان، اوچ بالام اوچ، بوگون اوچمالي گونوندور. ساباح يوخ اوبيري گون بايرامدير. حاجي يدالله نين خورما يوكو ساباح دا گلجك. سكينه يه بايرامليق آلديغين باشماقلارين پولونو قازاناجاقسان.....”
عنّاغي يوخلادي. من تك قاليب، داريخماغا باشلاديم. “كشكه بير كاميون يوك گلسه“ دئيه فيكيرلشه فيكيرلشه مني ده يوخو باسدي. من ده عنّاغي كيمي بوغازلاريني كسيب قيسسالتديغيم سرباز پوتونلاريمين باغلاريني آچيب، چكيب آياغيمدان چيخارتديم. جورابسيز آياقلاريم پوتونلارين ايچينده تردن قاييميشدي، قوخويوردو. دور بير آز هاوا يئسينلر، گون گؤرسونلر دئيه دابانلاريمي يئره قويوب، آياق بارماقلاريمي بيربيريندن آرالاديم. حيوان علي عسگرين آياقلاري ياديما گلدي. منيم كيچيك اوغلاني دئييرم. بو ايل دؤردونجو كيلاسدادير. دئييرم قوي بئشه جن اوخوسون، اوندان سونرا گتيريم اؤز يانيمدا مئيداني فيلاني تانيسين. اينديليك آغير گؤتوره بيلمز، آنجاق اَل داشقاسيني داليدان ايته له يه بيلر. من ده قوجاليرام، قاباقكي گوجوم قالماييب، يوك آغير اولاندا داشقاني چكه بيلميرم. اوشاق بير-ايكي ايل منه يارديم ائتسين، اوندان سونرا دا اؤزو اؤز يولونو تاپار. علي اكبر كيمي هوشلو باشلي اولسا ايدي، فرش ايشينده ياخچي چؤرك تاپاردي. او ماشاالله اوستا اولماغا باشلادي، يونو،ايپليگي، رنگي، نقشه ني ياخچي تانيير. داربست قورماغي، آرخاج چكمگي فيلاني دا اؤيرنسه اوستا اولاجاق. آنجاق عليعسگر رنگلري آييرد ائده بيلمير. ياشيل دئينده قيرميزيني گؤتورور، قيرميزي دئينده ياشيلي، ماوي دئينده بنفشي، ساري دئينده نارينجي ني. گئچن ايل يايدا فرش توخوماغا قويدوم، اوستا ماحمود بير هفته دن چوخ ساخلامادي. هرگون اللي يول “گئده غلط رنگي سالما“ ائشيده رك  كؤتك يئييردي. بيلميرم او آخماق معلمر بو يئتيمين نه اينه هوشلو باشلي دئييرلر. يوخ كيلاسين شاگرد اولي ايميش، معدلي اوندوققوز ايميش، ديهده(ديكته) ده، حسابدا ايگيرمي آليرميش، فارسي دا بيلميرم اونسكگيز آليرميش. نه ايله ييرم فارسيني مارسيني، اؤز ديليم يوخدور؟ اونون فارسي دا آلديغي اونسكگيزه، باخ او تره بار مئيدانيندا بير باغ سووزو بئله وئرمزلر. اونون يئرينه ايكي دانا ايلمگي دوغرو دوزگون سالابيلسه ايدي، خوشبخت اولاردي، فرش ايشينده يامان چؤرك وار. يوخ اوخوسا بيلميرم مهندس اولار، نم دؤهدور (دوكتور) اولار. منيم پولوم هاردادير ايگيرمي ايل اوشاق مدرسه يه گؤندرم كي من اؤلندن سونرا مهندس اولسون، هه؟ مهندس اولسا حامبال ممتّاغينين اوغلو اولدوغونو دانار، قبيريم اوستونه بئله گلمز. او آقاي خوش مزاج دير، كيمدير، او دييوسا دا دئيين اولا، شاگرد اوّل دير بير جوت گؤن باشماق آل وئر گئيسين دا. باهارين ايسديسينده رئزين باشماغين ايچينده جورابسيز آياق قوخار دا! او آخشام اوشاغي او حالدا گؤرونجه قان تپه مه قالخدي. گئده نين ائويني تانيسا ايديم، گئديب، قاپيسيني دؤگوب، كوچه يه چاغيريب، “گل سنه گؤرسه ديم نييه اوشاق كيلاسدا باشماغلاريني چيخارتميشدير آلچاق” دئيه پارچالارديم او ايت اوغلو ايتي. سيلله ايله بئله وورموشدو حيوان اوشاغين صوراتينين بير طرفي قاپ- قارا ايدي. بو ايل سونو اولسون، گلن ايلدن گتيره جه گم اؤز يانيمدا ايشله سين، اؤزو قازانسين گجيل دن سرباز پوتونو آلسين، آياقلاري رزين باشماغين ايچينده قوخوماسين، قوخوسا دا، آتاسي كيمي بورادا چيخارتسين قويسون گونون قاباغينا، هاوالانديرسين. او آقاي خوش مزاجين دا گؤتو  وارسا، گلسين بورادا آتاسينا دئسين باخ. هئچ واقت ياديمدان چيخماز، حيوان اوشاغين سول گؤزونه قان دولموشدو. بيلميرم ظالم اوغلو نئچه سيلله وورموشدو اوشاغا. بو يئتيم قالميشين دا ديلي دينج دورماز كي. واللاهي درس اوخويوب-ائله سه، سونرا گئديب سيیاسته ميیاسته قاريشاجاق، ديلي باشينا بلا اولاجاق، ايندي دن بللي دير. اوندان سونرا گل دَه، زيندانلاردان اوشاق آخدار. ياخچي سي اودور كي بو ايل سونو اولسون، گلن ايلدن گتيريم اؤز يانيمدا ايشله سين، باشيني سالسين آشاغي آدام اوغلو كيمي ياشاسين. دئيير “دئديم آقا تو هم بيا دو روز از اين كفشها بپوش، آنوقت ميبيني كه پاهاي تو هم مثل پاهاي من ميشود، در پشت ميز قايمكي كفشهايت را درمي آوري.” بير لحظه اوشاغين اورگيندن گئچن آرزو گؤزومون قاباغيندا جانلاندي: آقاي خوش مزاجين آياقلاري رئزين باشماغين ايچينده چورويوب، معلم ميزينين داليندا گيزلينجه باشماقلاريني چيخارديب، او لحظه آموزش و پرورش دن بير بازرس كلاسين قاپيسيندان ايچري گيرير...
گولمه گيمين قاباغيني آلابيلمديم، اليم ايله آغيز- بورنومو اوغوشدوروب، گؤزومون آلتيندان گيزلينجه عنّاغي يا باخديم، گؤروم اوياندي يا يوخ. گؤزونون بيريني آچيب، آشاغيدان يوخاريمي گؤزدن کئچيرركن “ ممتّاغي عمي باشووا گون ووردو دئيه سن“ دئدي.
قاري كؤرپوسوندن بيزه ساري گلن جوان اوغلان گؤزومه تانيش گليردي. علي اكبرين يولداشلاريندان مي يوخسا؟ دئيه فيكيرلشديم. يوخ، اولانمازدي. تزه باشماقلاري، تميز اوتولو شالواري، باهالي بير پالتوو وار ايدي. جوانين دوز بيزه ساري گلديگيندن تانيش اولدوغونا موطمعین اولدوم. آنجاق كيمين اوغلو اولدوغونو تاپابيلميرديم. تصادوفي بير حامبال چاغيرماق اوچون ساغا-سولا باخميردي. ياخينلاشيب، “سلام ممتّاغي عمي” دئيينجه اوزاق فاميللردن بيرينين اوغلو اولدوغونو سئزديم. تر- تله سيك باشماقلاريمي گئیيركن “بويور اوغلوم” دئديم. “آغام دئيير بير بيزيم توكانا گل“ دئدي. يئريمدن قالخاركن بئليمين آغريسي گئنه توتدو. بير آن نفسيم كسيلدي. يوموروقلاريمين ايكيسيني ده ايكي ياندان بئليمه قويوب، قاباغا ساري باساراق بئليمي دوزلتديم. اوتانديغيمدان باخيشيمي جوانين گؤزوندن قاچيرداراق دئديم “اوغول منيم بئليم آغرييیر، يوكونوز آغيرسا عنّاغيني آپار”. “آغام دئدي “گئت گؤر ممتّاغي عمي مئيداندا ايسه، ده گلسين” بيلميرم سن ايله نه ايشي وار” دئدي.
بيرليكده پالاندوز بازارينا ساري يولا دوشدوك. جوان اوغلانين اوزاق فاميل لرينین بيرينين اوغلو اولدوغونو بيليرديم. آنجاق“آدين نه دير؟ كيمين اوغلوسان” كيمي بير شئي سوروشماغا اوتانيرديم. "ماشاالله، ماشاالله بؤيوك كيشي اولوبسان، ماشا الله، ماشاالله، گؤز دگمه سين، هانسي كيلاسداسان؟” دئيه سوروشدوم. “اوّل راهنمائي اوخويورام عمي” دئدي. “ هه، دئمك كي بيزيم علي اكبر ايله ياشيت دير. او دا اوخوسا ايدي، ايندي اوّل راهنمائي ده اولاجاق ايدي. يوخسوللوغون اوزو قارا اولسون. آنجاق اوچه قدر مدرسه يه گؤنده ره بيلديم. اوندان سونرا فرش ايشينه قويدوم. آنجاق الله آ شوكور، هوشلو باشلي چيخدي، ماشاالله اوستا اولور.” دئيه دوشونركن جوان اوغلان فيكريمي پوزدو. “من توكاندا آغامين يانيندا ايشله مك ايسته ييرم، سونرا دا اؤزومه بير توكان آچارام دئييرم. آنجاق آغام مني زور ايله مدرسه يه گؤندرير. آخشام دا ائوده خوصوصي معلیم بئینيمي يئيير. بيلميرم بو كيمدير، فيزيك معلیمي، اوبيري كيمدير، رياضيات معلیمي، اوبيري كيمدير، موسيقي معليمي. آغام دئييب بو ايل معدیليم اون آلتينين اوستونده اولسا حساب پس اندازيما بير ميليون قوياجاق.” دئدي. هئچ بير شئي دئيه بيلمديم. آغير بير سوسقونلوق بوتون وارليغيمي توتدو. آدديم لاريم بيرآز ياواشلادي. چيگينلريمه آغير بير يوك اوتوران كيمي اولدو. اللي ايل يوك داشيميشديم، آنجاق هئچ بير زامان چيگينلريمده بئله بير آغيرليق حیسّ ائتمه ميشديم. “معديليم اون آلتي اولسا... بير ميليون...” ائشيتديگيمي بئينيمده خيردالايانماديغيمدان مي ايدي بو آغيرليق؟ يوخسا بير ميليونون نه قدر اولدوغونو حسابلاماغين چتينليغيندان مي؟ بو وضعيّتين نئچه دقيقه چكديگيني بيلميرم. بير آن يانيمداكي جوان اوغلانين بئينيمده كي قارانليغي، چيگينلريمده كي آغيرليغي و ائشيتديگيمي خيردالايانماديغيمي ترپه نيشيمدن اوخوياجاغيني و زیندگانليغيمين گؤرونمه مه لي يانلاريني گؤره جگيندن قورخدوم. فيكريمي داغيتماق اوچون “ماشاالله، ماشاالله، دئمك كي آغان سنين ده شاگیرد اوّل اولماغيني ايسته يير، هه. اینشاالله اولارسان اوغول” دئديم.
باشماقچيلار بازارينا دؤنوب، سول ياندان بئشينجي توكانين قاپيسيندان ايچري گيرديگيمیزده اوزون توكانين ديبينده ميزين داليسيندا اوتوران مشه يحياني اون ايلدن بئري گؤرمه ديگيمه قارشين تانيديم. ماشاالله ماشاالله كئيفي سازا بنزه ييردي. توكانين اورتاسيندا سقفدن آسيلان بؤيوك لوسترين ايشيغينين آلتيندا، دؤرت دؤره چكيلميش رفلرده كي تازا باشماقلار كيمي پاريلداييردي اوزو. توكانين بويابويونو توتموش اوزون خالچانين نقشه سي علي اكبرين سون زامانلاردا چكمه گه باشلاديغي نقشه لره بنزه ييردي. بير آن يانيمداكي جوان اوغلانا، “ اوغول، باخ، بو دا منيم اوغلومون هونري دير” دئمك ايسته ديم. آنجاق بئله بير سؤزون نه يئري، نه ده زاماني ايدي. توكانين ديبينده كي ميزين باشينا يئتيشيب، “سلام آقا مشه يحيا، ياخچي سوز اینشاالله” دئديم. الي ايله صندلي گؤرسه ده رك، “بويور اوتور، ممتّاغي عمي، بيربيريميزي گؤرمه يه لي اون بير-اون ايكي ايل اولدو.” دئيه جواب وئرديكدن سونرا قالخيب، يئگين آدديملار ايله توكانين قاپيسينين آغزيناجان گئديب، قارشيداكي قهوه خانا دا سماوارين باشيندا دوران آداما الي ايله ايكي چاي گتيرمه سي اوچون ایشاره ائديب، گليب يئرينه اوتوردو. صحبت ائتمه گه باشلاديق؛ ساغدان، سولدان، کئچميشدن، گله جگ دن، خاطیره لريميزدن دانيشديق. مني نييه توكانا چاغيرديغيني ماراق ائديرديم. آنجاق صحبتي كسيب، مني نييه چاغيرديغيني سوروشابيلميرديم.
ـ ممتّاغي عمي سيلابلي قاراشين حوسينين اوغلو ايّوبو خاطيرلاييرسان؟
ـ ايّوب دئديگين هانسي ايدي؟ تهراندا اولان، يوخسا آلمانا گئدن؟
ـ تهراندا اولان يعقوب دور. ايّوب اَن بؤيوكلري دير. آلماندادير.
ـ هه بيليرم، اون بئش ايلدن چوخدور كي آلماندادير.
ـ بلي، بلي، كئيفي ده چوخ سازدير ماشاالله. دييه سن بير نئچه دانا تاكسي سي وار. بعضأ تلفنلاشيريق، چوخداندير ائوله نيب، اوشاقلاري دا بؤيويوبلر.
ـ هه، چوخ ياخشي، چوخ گؤزل. سيوشالي (خسروشاه لي) قاديرين دا اوغلو اوردادير. بيربيرلريني گؤرورلر؟
ـ بلي، دئييردي چوخ آذربايجانلي وار كؤلن شهرينده، هامي سي دا بيربيرلريني تانيیيرلار، گئت-گل لري وار. كئيف لري ده چوخ سازدير ماشاالله.
ـ او نه ايشه باخير؟
ـ مدرسه يه گئدير
ـ اكابير كي آخشاملاري اولار. گوندوزلري نه ايله يير؟
ـ خئیير جانيم، گوندوزلري مدرسه يه گئدير.
ـ قيرخ ياشيندا آدام نئجه يعني مدرسه يه گئدر؟
ـ ايش مدرسه سي نه گئدير. ايش اؤيرنمك اوچون گئدير.
ـ خرجيني قادير بورادان گؤندرير؟
ـ خئیير جانيم، آلمان بورا كيمي دگيل. ايشي اولمايانلارين خرجيني دولت وئره ر. ايش اؤيرنمك ايسته ييرلرسه ده، مدرسه يه گؤندرر. اوچ هفته ده تعطيله گئتمك حقلري وار.
“مني نييه توكانينا چاغيرديغيني ايندي بيلديم. بو دا تبريز بازارچي لارينين بير پاراسي كيمي ميرت-زارافات اهلي دير. بير توركه ساياق آدام تاپيب، سارييب، مچل ائديب، اؤزلرينه ميرت دوزلتمك ايسته ييرلر. ياخشي سي بودور كي توكان قومشولاري گلمه ميش، تئز دوروب، گئديم.” دئيه فيكيرلشركن مشه يحيي سؤزونون داليسيني توتدو. “ممتّاغي عمي بيليرسن آلماندا هئچ گليري اولمايان بئله دؤلتدن آيدا اَن آزي اوچ يوز اللي اويرو آلار،” دئيركن ميزين اوستوندكي حساب ماشينينين دوگمه لرينه باساراق ديل-دوداغي آراسيندا‌ “سيصدو پنجاه ضرب در هفتصد، مساوي دويست و چهل و پنج هزار تومن” ميزيلداناراق، “بلي، ايكي يوز قيرخ بئش مين تومن ائدر” دئدي. جوابيندا اوزون بير ب ....ل....ي دئمك ايله “ائشك دَدَن دير، گئت ددنين ساققالينا گول” دئمك ايسته ديگيمي آنديرماغا چاليشديم. او ايسه منيم ب...ل...ي مين معني سيني باشا دوشمميش كيمي اينانديريجي بير سس تونوندا “گئچن هفته ايّوبون خانيميسي گلميشدي بورايا، دئييردي“ كؤلن شهرينده بير دانا انجمن قورموشوق، ديليميزين، فرهنگيميزين آرادان گئتمه سينين قاباغيني آلماغا چاليشيريق. بونون يانيندا دا آيري خئير ايشلر گؤروروك.” دئيه سؤزونه ایدامه وئردي. من ايسه اونون دئديكلريني ائشيتمير كيمي “جان ننه ني گؤندر او زامان آلمانا، قيرخ ياشيندا ايشسيزي ايش كیلاسينا گؤندرن دؤلت اونو دا دانس كيلاسينا گؤندرسين.....” دئيه فيكيرلشيرديم.
قاپي نين آچيلماسي ايله مشه يحيي سؤزونو كسيب، آياغا قالخيب، موشتريلري قارشيلاماغا گئتدي. بير آقا، بير خانيم يانلاريندا اون ـ اون بير ياشلاريندا اوغلان اوشاقلاري ايله ايچري گيرديلر. سلاملاشديقدان سونرا جوان كيشي خانيمينا دؤنوب،ياواش و ادبلي بير سس تونو ايله “ ايشين اولماسين، قوي اوشاق اوزو سئچسين” دئدي. اوتوراراق اؤزونو اوشاغين بويونا گتيريب، اوشاغين باشيني اوخشاركن “اوغول اؤزون باخ، هانسيني بگنسن گؤستر آقا يحيي وئرسين گئي“ دئدي. اوشاق سئوينج ايله باشماق رفينه ساري گئديب، باشماقلارين هر بيرينين اوستونه بير يول بارماغيني قويوب، ديل ـ دوداغي آراسيندا “ يوخ، بونو استه ميرم، بونو دا ايسته ميرم، م م م م م م    دور بير ده باخيم، آها بو قيرميزي لار گؤزلدير، آما يوخ ايسته ميرم. هه..... تاپديم، تاپديم ، بونلاري استه ييرم، باخ......“كيمي دانيشيردي. نئچه جور باشماق و نئچه جور رنگ آراسيندان هانسيني بگنديگيني آييرد ائتمه گه چاليشان اوشاغين شيرين حركتلرينه دیققت ائدركن بيردن بيره علي عسگر ياديما دوشدو. او آن  بلكه گئنه مدرسه دن تازا قاييتميش، آناسي ايله چيغيريشيردي، “يئتيم قالميش او آياقلاريني يوو سونرا گل، قوخودان ائوده دورماق اولمور“  او دا آناسينين آغزيني اگيردي “ يي يي يي .... حووضون بوزو آچيلماييبدير، گل آفتافا ايله سو تؤك يووم دا....“ مشه يحيي اوشاغين ايسته ديگي باشماقلاري بير ـ بير گئيديريب، چيخارتديريب، آتاسي ايله، آناسي ايله مشورت ائديب، سونوندا  آلديقلاري باشماقلاري قوطوسونا قويوب نايلون توربانين ايچينده جوان كيشينين الينه وئريب، پولونو آليب، قاپينين آغزيندان يولا سالديقدان سونرا  گليب يئرينه اوتوراركن “ ممتاغي عمي كيچيك اوغلون نئچه ياشيندادير؟“ سوروشدو.
ـ نوكرينيز اون بير ياشيندادير.
ـ دور اونا بير جوت باشماق وئريم، بايرامليق اولسون.
ـ خئير، چوخ ساغ اولون آقا مشه يحيا، آلله سايه نيزي باشيميزدان اسگيك ائتمه سين. منيم صدقه آماغا عادتيم يوخدور.
ـ صدقه دگيل جانيم. من اؤزومدن ده وئرميرم. بؤينوما وظيفه قويوبلار. باياق سؤزونو دانيشديغيميز ايُوبون خانيميسي آلمانا قاييداجاغيندان بير گون قاباق بورايا گلديگينده، منه بير آز پول وئريب و كؤلن آذربايجانليلاري انجومني طرفيندن گؤندريلديگيني بيلديررك موستحق گؤردوگوم خانیواده لرين اوشاقلارينا او پولون يئتري قدر بايرامليق وئرمگيمي ايسته ييبدير.
ديشيمي قيسيب، ساغ يوموروغومو دوگونله ديم. مندن چوخ جوان و گوچلو ـ قووتلي اولدوغونا قارشين يئريمدن قالخان كيمي بورنونون اوستوندن بير يوموروق ايله ياتيردارام بو ايت اوغلو ايتي. ايندي اونا ممتاغيني ايشیندن گوجوندن قويوب، سابيل اميردن بورايا قدر گتيريب، ميرت ائتمگين نه دئمك اولدوغونو گؤرسه درم. كيمي فيكيرلشيركن، مشه يحيي نين اوغلو قاپاغي آچيق بير باشماق قوطوسو ايله منه ساري گليب، “بويور، ممتتاغي عمي“ دئيه رك قوطونو منه وئردي. تكي يوموشاق بير كاغاذ ايله دؤشه لي قوطونون ايچينده بير جوت آچيق قهوه رنگي گؤن باشماق يان ـ يانا ياتميشديلار.
ايللر بويو اوزاق اؤلكه ده ياشايان آنجاق اصالتلريني ايتيرمه ين آذربايجانلي لارين غئيرتينه حئيران اولدوم. بير آن اؤزومو بير اینسان اولاراق اینسانلارين ايچينده گؤردوم. مشه يحيي نين مني سريديگيني دوشوندوگوم اوچون سويوق تر ايچينده بوغولدوم. عؤمرونده رئزين باشماقدان باشقا تانيمايان علي عسگرين ده فيكرينده اولانلار وار ايميش بو دونيادا! سئوينجيم ايله اوتانجيم، آغلاماغيم ايله گولمه گيم بير بيرينه قاريشدي. حامبال ممتاغينين اوغلو علي عسگري ده يادا سالانلار وار ايميش بو دونيادا. ساغ اولسونلار، ساغ اولسونلار. ايللردن بئري اوزاق اؤلكه ده ياشايان، آنجاق اوركلري هله ده آذربايجاندا چيرپينان بو اینسانلارا اؤز مينت دارليغيمي و سئوينجيمي يئتيره بيلمك اوچون سسيمين ايسته مه دن گئت گئده اوجالديغينين يانيندا ایخيتیياريم اؤز اليمده دگيل ايميش كيمي گيزلين بير گوج طرفيندن اوتوردوغوم يئردن قاوزانير كيمي اولوردوم. بو اینسانلارا يئتيشمك، اونلار ايله سئوينجيمي پايلاشماق ايسته ييرديم. اونلارين بايراملارينا قاتيليب اونلاردان بيري اولماق ايسته ييرديم. آنجاق نه اوزوم، نه سسيم اونلارا چاتابيلديگي اوچون تك چاره ني وار گوجوم ايله “ ساغ اولون، ساغ اولون” دئيه باغيرماقدا گؤروردوم.
غئيب دن بير ال چيگينيمدن باساراق، بير باشقا ال ده آغزيمي توتدو. بيريسي قيسيق بير سس ايله قولاغيما فيسيلدادي “چيغيرما، اويان، اويان، نه باغيريسان، بوگون يكشنبه دير، قومشولار ايندي اويانيب، پليس چاغيرارلار” يوخودان اويانيب، اؤزومو قان تر ايچينده گؤردوم. دورمادان بير ساعات قاچميش كيمي نفسيم دؤگونوردو. اورگيم سينمدن چيخماق ايسترجه سينه چيرپينيردي. زامان و مكاني آييرد ائده بيلميرديم. هاردا و هانسي زاماندا اولدوغومو بيلمه ديگيمدن ده اؤتري، كيم اولدوغومو بئله بيلميرديم. مشه يحيي نين دوكانينداكي باشماقلار گؤزومون قاباغيندا، علي عسگرين آياقلارینين قوخوسو هله ده بورنومدا ايدي. حايات يولداشيم دوروب، چيراغي يانديرديقدان سونرا آچيق قهوه رنگي باشماقلار گؤزومون قاباغيندان محو  اولدوغونا ياناشي ياشام بويو بير آرزو كيمي گؤزومون قاباغيندا گزديرديگيم بئله بير بايرامليق آلديغيمين سئوينجي ده  كدر و قارامسارليغا دؤنوشمگه باشلادي. تبريزده علي عسگرينه بير عؤمور بويو اینسانا لاييق بير جوت باشماق آلابيلمك حسرتينده قالان حامبال ممت تاغي دگيل كؤلن شهرينده ممت تاغي لاردان خبرسيز ياشاديغيمين بيلينجينه يئتيشينجه روحومون درينلريندن بير اوتانج دويغوسو اوجالماغا باشلادي. ممت تاغينين  تصوورونه بئله سيغمايان اجتماعي ایمكانلارين اولدوغو بير اؤلكه ده ياشاييرديم. ايشسيز قالديغيمدا ايش اداره سينين، يوخسوللاديغيمدا اجتماعي يارديملار ایداره سينين، خسته لنديگيمده خسته ليك بيمه سينين داليمدا اولاجاغيندان هئچ نیگرانچيليغيم يوخ ايدي. يوخسوللوقدان علي عسگريمي مدرسه يه گؤندره نمز ايسم ، گئنه بير دؤلت موئسیسه سي خرجيني وئريب، مدرسه يه گؤندرجك ايدي.
حايات يولداشيم بير ليوان سو گتيريب، ياتاغين يانينداكي ميزين اوستونه قويدوقدان سونرا يانيما اوتوروب نه يوخوسو گؤردوگومو سوروشدو. ايكي اليم ايله اوزومو قوجاقلاييب، باشيمي آشاغي تيكديم.  بير آن اؤنجه گؤردوگوم يوخو ايله ايچينده ياشاديغيم واقعيت آراسيندا آوارا قالميشديم. تبريزده بير پارا مريض خانالارين گيريش قاپيسينين جاميندا ”مراجعين بيمه هاي اجتماعي پذيرفته نميشوند” يازيلديغيني و  ساغليغين آنجاق پوللولار اوچون آيريلميش باهالي بير مال اولدوغونون يانيندا الي آغزينا چاتانمايانلارا اؤلمك بئله عهده سيندن گلينمه يه جك بير خرج اولدوغونو ايكي ايل اؤنجه گئديب قاييدان يولداشلاريمين بيريندن ائشيتميشديم. ايشسيز بير اینسانين ائو كيراسي، يئييب ايچمه خرجي، اوشاقلارينين بوتون خرجي و خسته ليك بيمه سينين آبونه سينين يانيندا بير ده اوچ هفته تعطيلاتا گئتمك خرجي دؤلت طرفيندن قارشيلانير فيكري  تبريزده ياشايان ممت تاغي يا اينانيلماز اولمالي ايدي.
فيكريمين پريشانليغيندان گؤردوگوم يوخونو آنلاتماغا گوجوم يوخ ايدي. قيسسا بير جومله ده خولاصه ائتمك اوچون “حامبال اولموشدوم” دئديم. حايات يولداشيم بيردن بيره پؤرتوشدو، تاسف ايله باشيني توولاياراق ” به به، به به ، باشيما خئير، ايلك تانيشديغيمزدا بير نئچه ايل سونرا  Steuerberater مشاور مالی اولاجاغام دئييردين. هله ايندي ايندي حامبال اولدوغونو يوخودا گؤرورسن؟” دئييب، مندن بير جواب گؤزله مدن يورقاني باشينا چكدي.  قالخيب پنجه لريم اوسته يئريه رك ميطباغا گئتديم. ميطباغين قارانليغيندا پنجره دن گون چيخاندا  قاشين آغارديغي  گؤرونوردو مين اوچ يوز سكسن ايكينجي ايلين ايلك گونونون ايلك ساعاتلاري باشلاماقدا ايدي. بير اؤنجه كي  گئجه   ساعات اوچه قدر يئييب ايچيب، چاليب اوخويوب  اويناييب، دئييب گولموشدوك و سونوندا آيلاردان بئري چوخ اطرافلي موباحیثه لره موضوع ائديلن، نئچه رسمي و غئير رسمي ایجلاسدا پروگراملاشديريلان چوخ تمطراقلي و خرجلي مخاریجلي بايرام شنليگيميزين  ياخچي گئچديگينين سئوينجيني پايلاشميشديق.
بو قدر ایجلاس و موباحیثه لرده “بيز بورادا بايرام توتوب، چاليب اويناركن كيچيك بير بايرامليق ايله آذربايجاندا ياشايان بير ممت تاغينين دا اوشاغينين اورگيني سئوينديرك” كيمي بير فيكير اورتايا قویانيميز اولماديغينا تأسوف ائدركن ”بو ايل اولمادي، آنجاق بير داهاكي ايله گئچ اولماييبدير” دئيه اؤزومه اوميد وئرمگه چاليشديم.
کؤلن، مارس 2006
Submit to DeliciousSubmit to DiggSubmit to FacebookSubmit to Google PlusSubmit to TwitterSubmit to LinkedIn