Warning
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • JLIB_APPLICATION_ERROR_COMPONENT_NOT_LOADING
  • Error loading component: com_content, Component not found.
  • Error loading library: joomla, Library not found.
  • Error loading library: joomla, Library not found.
  • Error loading library: joomla, Library not found.
  • Error loading component: com_content, Component not found.
  • Error loading component: com_content, Component not found.

معصومه نین محزون باخیشی- درویش اوغلو

نه باخیرسان بئله محزون؟
یوخسا دونیا ییخیلیر؟ سو تاپیلمیر ایچیله؟
قورویور دوزلو گؤلون؟ شورا قالخیر هاوایا؟
نوح طوفانی قوپور تبریزده؟ نفس آلدیقجا اوتور دوز جیگرین؟
نه باخیرسان بئله مظلوم؟
کؤرپه نین سوت مه مه سین یوخسا آپاردی سرطان؟
دلی دیوانه کیمی چایخادا سرگردان
باجین ارسیز یئتیشیب قیرخا، اولور دیوانه؟
قارداشین جنگ ده وئرمیش آیاغین اسلامه؟
نه باخیرسان بئله مکتوم؟
باخیشیندان اوخونور، سانکی کسیبلر دیلینی
یازماغا بیر قلم آلدینسا قیریبلار الینی
اولمایا حبس و شکنجه گؤرورسن رؤیاده؟
عؤمرونون گنج چاغیندایسا بوکوبلر بئلینی؟
نه باخیرسان بئله مظلوم؟
باخیشیندا قارا بایرام گؤرونور
کوی و بازاردا انسان آسیلیر؟
یوخسا بیر لقمه چؤرک آغزینا تپمیش جوانین
حددی تعیین اولونوب ال کسیلیر؟
نه باخیرسان بئله محزون؟
باشلاریندا ساریغی، میللتی ارعابه سالیرلار؟
خیاواندان توتولان قیزلاری اعرابا ساتیرلار؟
یوخسا بو خلق ایوشوب، آنلاماییر ارعابی
افیونلا هوشونو، عقلینی، جان – مالین آلیرلار؟
نه باخیرسان بئله معصوم؟
گؤزلرینله دانیشیرسان، نییه کی یوخدور دیلین
چاتماییر تانرییا دا، گؤیلره آچسانسا الین
نئجه ییغدین بو قدرداغ کیمی دردی گؤزونه؟
بیر باخیشلا بوتون افلاکه چاتیر دردی ائلین
نه باخیرسان بئله محزون؟
آچیلیب مکتب و منبر اوخونور قرآن لار
اینانیرلار کی گله مرجع عدل، انسانلار
او زاماندیر کی عدالت قیلینجی حؤکم سورر
کسیلر حؤکم عدالت له نئچه قوربانلار
نه باخیرسان بئله محزون؟
هله گؤزله، او زامان چوخ چکجک
یاخجی – پیسلرده سیناقدان کئچجک
تا ظهور ائیله یه بو شمس عدالت مظهر
بیرچوخ انسان اورگی چوخلو قارا قان ایچجک
نه باخیرسان بئله محزون؟
گلمه میش شمس عدالت عؤمورون چاتسا باشا
دهر باقی ده گؤررسن نئجه دیر بو تاماشا
حوری – قیلمان نئجه حاظیر دوراجاق گؤزله یه جک
کی صراطی کئچه سن تا او باشا
نه باخیرسان بئله محزون؟
نه باخیرسان بئله معصوم؟
نه باخیرسان بئله مظلوم؟
نه باخیرسا بئله مکتوم؟
    معصومه بیر آد اولاراق یوخ، عصمتلی خانیم آنلامیدا ایشله نیلیب *
کؤلن، مای 2015
Submit to DeliciousSubmit to DiggSubmit to FacebookSubmit to Google PlusSubmit to TwitterSubmit to LinkedIn