وارلیق درگیسی اؤز اؤلکه‌میزده نشر اولمالیدیر !....
- توضیحات
- منتشر شده در چهارشنبه, 11 شهریور 1394 21:56
اینترنتده یاییلان معلوماتا گؤره، دوکتور محمدرضا هیئت بیگ یاخین گله جکده وارلیق درگیسی نین نشرینی دوام ائتدیرمک مقصديله بو آددا بیر درگینی تورکیه ده چیخارماق قرارینا گلمیشلر.
قئید ائتمک لازیمدیر کی، مرحوم دوکتور جواد هیئتین وفاتیندان سونرا، وارلیغین نشری‌نین دوامی اوچون یازیچیلار قورومو طرفیندن آددیملار آتيلميشدیر، آنجاق بیر سیرا حقوقی انگل‌لر، خصوصیله وراثت مسأله‌سیندن دولایی، آتیلان آددیملاردان نتیجه آلینمامیشدیر.
محمدرضا هیئت بیگین اوُزون ایللر بویو وارلیغین نشری اوُغروندا امک صرف ائتمه‌سي هامییا بللی و تقدیره لاییقدیر. آنجاق بئله دوشونوروک کی، آتالار دئمیشکن «داش دوشدوگو یئرده آغیر اولار....». بو اوزدن بیزجه وارلیق اؤز «بیرلشدیریجی» ايلکه‌لرينه باغلي قالاراق، اؤلکه میزده یاشاییب، وطنینده دوام ائتمه لی‌دیر. مرحوم دوکتور هیئتین وصیتی ده بونو تاپشیرمیشدیر. طبیعی کی، بیز بوُ یولدا گر‌کن آددیملاری آتماغی اؤز بورجوموز سانیریق و بو یؤنده وار گوجوموزله چالیشاجاغیق.
محمدرضا بیگین دوشوندوگو او درگییه «یولون آچیق اولسون!» دييه‌رک، هله‌ليک بونو ساده‌جه بیر آد بنزرليگي گؤروب، قئید ائدیریک کی، هله‌لیک او درگییه هئچ بیر یازی ایله قاتیلماق قراریندا دئییلیک.
وارلیق یازیچیلاریندان:
عزیز محسنی/ حسن مجید زاده (ساوالان)/ ابراهیم رفرف/ علیرضا صرافی/ اسماعیل هادی
