نئیه گولورسن تبریز! ــ محمد احمدی زاده
- توضیحات
- منتشر شده در سه شنبه, 10 دی 1392 03:55
ائل” گؤلو”پارکینین وحشت تونئلینده کی قورخوما می یوخسا
آلنیما باستیغین او قوربت دامغاسینا
یا دا” پاساژ” کوچه سینده، سودوح قوخوسوندا
لاواش آراسیندا یئدیغیم او یومورتا، یئرآلماسینا
شعرشعرهانی به دئمیشدین” ححماوار”ین بستانلاریندان
ساخلادیغین منه وارهله
بیر نئچه کالاه، قوهون جیبلرینده.
هانی به دئمیشدین منه، “نوکززه” نین ایلمک سالان قیزلاریندان
گؤزلری دئییل، دوداخلاری ایسلاناجاق بیر جوت اوپوش هوسینده.
“مارالان” دان گئچرکن، هئچ دوخونمادیم بیله
“قییاس” محلله سینین او سوواخدان دووارینا
ییخیلماسین دییه، یالقیز آبانین یاتاق اطاغینا
آما سن تپیک لرینی باستین قوجامان “ارک” قالاسینا
اوچورتدون اونی آیاق آلتینا توشموش تاریخ کیتابیما
سونرا دا هر جومه لری قالخدین آیاغا
جنازه سی اوسته مئییت نامازینا
اونوتمایاجاغام هر سنه منی
معللیمین میزی اوستونده اوزالتدیغینی
عقدیم اوخونمادان حامیله اتدیغینی.
اونوتمارام اؤیرنمه ین آنادیللرینی
او دوغوردوغوم اون ایکی بیج اوشاق مدرسه کارنامه لرینی.
اونوتسام دا دوققوز یاشیندا کی مدرسه می
آووج لاریمین ایچینده شیلانگین ایستی سینی
هله ده اونوتمارام اون دوققوز یاشیمی
یونیورسیته نین اؤنونده
ماسکه لی موتورچونون باتوموندان
دیزلریمین آغری سینی
آه “ثیقه الاسلام”!
منیم سون صینیف مدرسم
ایک سفر باشماقلاریمین دابانینی یاتیرتدیغیم گؤنلر
“سه راه امین” ده ایلک سیگاریمی چکیب گونه شه، بوی دئدیغیم گؤنلر
هارالاردایدین به سن تبریز!
تپیک لر آلتیندا دیشلریمین سیندیغیندا
اللریم اوستونده سیگارلارین سوندورولدوغوندا
اوشاقلیغیمی، هفته سونو گزی لریمده
حامیله بیرقادین کیمی دوشوردون
”گولوستان باغی” نین تووالت لرینده.
گنج لیغیمی دا بوغدون
بالاجا قارا بالیغین گؤزونده کی هوسینه
دنیزین ماویلیلیک توزونو سرپتیکدن سونرا
“آراز” نهیرینده.
ایندی به هارداسان تبریز!
بو یاشلیلیق سورگونومده
گل باری توت الیمدن
قازیم آرزولاریمین مزارینی
اوشاقلیق، جاوانلیق، یاشلیلیغیمی
قویلاییم اونلارلا بیرلیکته
یالنیزلیق قبیریمده.
