عليرضا اردبيللي: تورکلر ايرانين ائليتاسيندان اوزاقلاشديريلير
- توضیحات
- منتشر شده در سه شنبه, 27 اسفند 1392 00:05
عليرضا اردبيللينين فيکرينجه آذربايجان تورکلري و عوموميتله ايراندا ياشايان تورکلرين اؤلکه‌نين يوکسک سياسي ائليتا طبقه‌سيندن اوزاقلاشديريلماسي يئني بير پروسئس دئييل. آذربايجانلي ژورناليست، يازار و سياسي فعال آمئريکانين سسي ايله موصاحيبه‌ده اؤلکه‌نين حاکيم ائليتاسي و عوموميتله يوکسک سياسي طبقه‌سينده آذربايجان تورکلرينين سايينين تدريجن آزالماسينين سببلريني شرح ائديب.
عليرضا اردبيللينين سؤزلرينه گؤره، تورکلر و خوصوصيله آذربايجان ويلايتلرينده ياشايان تورکلرين اؤلکه‌نين سياسي ائليتا طبقه‌سيندن چيخاريلما پروسئسي پهلوي رئژيمينين ايقتيدارا گلديیي دؤنمدن باشلاييب.
"مشروطيت دؤنمي و عوموميتله پهلويلردن اؤنجه ايران آريستوکراتيياسي اساسن تورکلردن عيبارت ايدي. تحصيل اوچون غرب اؤلکه‌لرينه گئدنلرين آراسيندا هارداسا غئيري-تورک يوخ ايدي،" دئيه گونئيلي ژورناليست اينديکي دورومون کسکين شکيلده فرقلي اولدوغونو سؤيله‌يير: "بير زامانلار عالي تحصيل باخيميندان بيرينجي سيرادا اولان آذربايجان ايندي بو خوصوصدا ايرانين ان گئري قالميش بؤلگه‌لريندن ساييلير."
گونئي آذربايجان ميللي دئموکراتيک بيرليگي تشکيلاتينين سؤزچوسونون فيکرينجه آذربايجان تورکلرينين يوکسک سياسي ائليتا صينيفيندن اوزاقلاشديريلماسي ايران حاکيميتلرينين اساس سياستي اولوب. او، بو حاقدا اوزون ايللر ايرانين خاريجي سيياستينين اؤنملي آدامي و اينديکي پرئزيدئنت ناميزدي علي اکبر ويلايتي‌نين سؤزلرينه ايشاره ائديب: "علي اکبر ويلايتي دئميشدي کي، آذربايجاندا سرمايه ياتيرماياق، چونکو گئج يا تئز ايراندان آيريلاجاق."
ايسوئچده(سوئدده) موهاجيرتده ياشايان جناب اردبيللينين دئديکلرينه گؤره، ايران آذربايجانليلاريندان علاوه،آذربايجان رئسپوبليکاسينين دا صيرف وارليغي ايران حاکيميتيني ناراحات ائدير.
"ساده‌جه يوکسک سياسي ائليتا دئييل، حربي قوروملاردا دا بئله‌دير. حالبوکي، ايران-عيراق موحاريبه‌سينين آپاريجي ژنراللاري‌نين بؤيوک حيصه‌سي آذربايجاندان ايدي،" دئيه، عليرضا اردبيللي علاوه ائديب.
ژورناليست همچنين بو اوزاقلاشماغين ساده‌جه حاکيميت طرفيندن دئييل آذربايجان تورکلري طرفيندن ده حياتا کئچيريلديیيني بيلديريب: "بو اوزاقلاشما ايکي‌طرفليدير. ميثال اوچون، آذربايجان ايالتلري کوردوستان ايالتيندن سونرا ايران سئچکيلرينده اَن آز فايزله ايشتيراک ائدن بؤلگه اولوب."
جناب اردبيللي آذربايجان تورکلري ديگر غئيري-فارسلار ايله موقاييسه‌ده داها چوخ ايرانا اينتئقراسييا اولوندوغو حاقدا خاريجي مئديانين يازديقلاريني دوزگون سايمير. "مذهبلرين عئيني اولماسي و تورکلرين نوفوذونون يوخاري اولماسي و ايرانين هر يئرينه داغيلماسي بئله بير تصوورون اورتايا چيخماسينا سبب اولا بيلر،" دئيه او، قئيد ائديب.
