داوود توران: میللی فعاللارا قارشی تزییقلر داوام ائدیر و روحانی دؤنمینده بونون آزالدیغینی گؤرموروک
- توضیحات
- منتشر شده در دوشنبه, 18 فروردين 1393 21:21
آزربایجان میللی دیره‌نیش تشکیلاتینین صدری داوود تورانین آمئریکانین سسینه موصاحیبه‌سی
دیلشاد الییارلی
پرئزیدئنت حسن روحانی حؤکومتینین قربله کونستروکتیو علاقه لرین یارادیلماسی سیلرینه باخمایاراق، ایران آزربایجانلیلاری اونون سئچکی کامپانییاسی زامانی وئردیگی ودلره عمل ائتمه‌دیگیندن نارازیدیر. گونئیلی فعاللار اؤلکه‌ده ائتنیک آزلیقلارا قارشی آیری-سئچکیلیک سییاستینین داوام ائتدیریلدیگینی بیلدیریر.
آزربایجان میللی دیره‌نیش تشکیلاتینین صدری داوود توران آمئریکانین سسینه موصاحیبه‌ده ایران آذربایجانیندا میللی فللارین مدنی حوقوقلار اوغروندا موباریزه‌سی، اورمییا گؤلونده ائکولوژی وضعیت و پرئزیدئنت حسن روحانی هؤکومتینین ائتنیک آزلیقلارا تزییقلریندن دانیشیب.
داوود توران پرئزیدئنت روحانینین سئچکی کامپانییاسی زامانی وئردیگی ودلره باخمایاراق، حاکیمیتده اولدوغو بیر ایل مودتینده بو ودلره عمل اولونمادیغینی بیلدیریب. او، ایراندا اینسان حوقوقلارینین، خوصوصیله ده ائتنیک آزلیقلارین هاقلارینین پوزولماسی کیمی جیدی پروبلئملرین قالدیغینی دئییب.
داوود توران اورمییا گؤلونون قوروماسی پروبلئمینه خوصوصی دیقت چکه‌رک، حسن روحانی هؤکومتینین ائکولوژی وضعیتله علاقه دار فعالیت گؤسترمه‌دیگینی بیلدیریب.
“حسن روحانی آزربایجان بؤلگه‌سینه گلدیگی زامانی ائتنیک قروپلارین اؤز آنا دیلینده تحصیل آلا بیلمه‌سینه تمین ائده‌جگینی و حتّی آذربایجان دیلنیده بیر قوروم تشکیل ائدیله‌جگینی، اساس پروبلئملردن بیری اولان اورمییا گؤلونون قوروماسینین قارشیسینی آلاجاغینی دئمیشدی. لاکین بو گونه قدر بیر آددیم آتیلدیغینی گؤرموروک”-دئیه داوود توران بیلدیریب.
او، آذربایجانلی میللی-مدنی و سیاسی فعاللارا قارشی باسقیلارین داوام ائتدیگینی، بین الخالق آنا دیلی گونو میللی فعاللارین حبس ائدیلیب، هله ده تبریز و اهر شهرلرینده ساخلاندیغینی، عئینی زاماندا، ایران آذربایجانلیلارینین آنا دیلینده کیتاب و قزئت نشر ائتمه‌سینه مهدودیتلرین قویولدوغونو وورغولاییب.
آزربایجان میللی دیره‌نیش تشکیلاتینین صدری آذربایجان فعاللارینین دوروموندان دانیشاراق، اونلارا اوزونموددتلی حبس جزالارینین وئریلدیگینی قئید ائدیب. داوود توران پرئزیدئنت حسن روحانینین حاکیمیتی دؤنمینده آذربایجانلیلارلا یاناشی، ایراندا یاشایان دیگر ائتنیک قروپلارین عوضولرینین ده تقیبلر، حبسلر و تزییقلرله قارشیلاشدیغینی دئییب.
“آزربایجانلیلار یاشادیقلاری یئرلرده چوخلوق تشکیل ائدیرلر. ایران هؤکومتینین ده قورخوسو وار، اعدام یولو ایله تزییق گؤسترمیر، آما اوزونموددتلی حبسلر، عاییله عوضولرینی قورخوتماق، گئجه ائولرده آختاریش آپارماق و نزارت آلتینا آلماق یولو ایله تزییقلر داوام ائدیر و روحانی دؤورونده هئچ بیر شکیلده آزالما یوخدور”-دئیه داوود توران آمئریکانین سسینه بیلدیریب.
آمئریکانین سسی
