تشکیلات رمزلری- آذربایجان سوسیال دمکرات پارتیسی
- توضیحات
- منتشر شده در پنج شنبه, 26 دی 1392 00:04
سیاست ده مفهوم اوُلماسا ، تشکیلات بیرلیگی اوُلماسا ، سیاسی تشکیلاتین دمکراسیا دایالی فعالیت شیوه سی اوُلماسا ! بوگونکو چاقیمیزدا هئچ بیر سیاسی حرکت دیکتاتورلارا غالیب گئله بیلمز. سیاست بیرعلم اوُلاراق ، کوُنکرت متـُد وآراشدیرما سیستمی ایله توپلومسال و سیاسی مسئله لری تجزیه و تحلیل ائدر. بو تحلیللرین تئمئلی اوُبژئکتیو (عینی) فاکت لارا ، تاریخی اوُلقولارا(حادیثه لره) دایانار. سیاست ده گرچئکلره (حقیقت لره) دایاناراق ، رئاللیق دان حرکت اتسئک ، اوُنون اساسین تعیین ائدن فاکتورتشکیلات دیر. تشکیلاتین تئمئلی و اوُنون ایش شیوه سی دمکراسی دیر. هرهانسی تشکیلاتین اساسی دمکراسی و دیالوگ اوُزرینده قورلورسا، اوُ تشکیلات اوُز ایستراتژیک و تاکتیکلرینده باشاریلی اوُلابیلر.گونئی آذربایجانین میللی آزادلیق حرکاتی و اوُنون اوُنونده گئدن سیاسی ، مدنی تشکیلات لاری بیر شعارین ، بیرایستۀ ین اوُزرینده اوُ تشکیلاتی یارادمالیدیرلارکی ، بوتون گوُنئی آذربایجان میللی آزادلیق حرکاتی اوُنوقبول اتسین ، بوایستگین أساسیندا لازیم اوُلان تشکیلات کی همان جبهه دن عیبارت دیر، قورولوب قبول ائدیلسین . أگر بو ایستکلۀ جبهه قورولوب و اوُنون ایستقامتینده گوُنئی آذربایجان پارلامنتین سوُرگون ده برپا ائده بیلرسه ،آذربایجان میللتینه بوُیوک خیدمت ائدیلمیش اوُلار. دونیادا میللی آزادلیق حرکت لری گوُستریب لر کی ، بیرویا ایکی تشکیلات میللی مسئله نی واوُنون ایستک لرینی یئرینه یئتیره بیلمزلر. تهران رژیمیدۀ چالیشیرکی بو بیرلیک تشکیلاتی نین یارانیب ، قورولماسینا جوُر بۀ جوُر مانع لریارادسین وبیرعده آذربایجانلیلارایسه بیرلیک مسئله سینی فیکیر سیز، هدفسیزمطرح ائدیب ، جبهه تشکیل وئریب ، بیر ایکی آیدان سوُنرا ، پارچالانیب، اوُنئملی بیرایش قاباقا آپارابیلمه دن ، بیلرئک یا بیلمه یئرئکدن حرکته جیـّدی و استراتژیک ضربه لروُورولار . بئس چاره نئدیر ؟ عرب اوُلکه لری نین آزادلیق و دمکراتیک حرکاتی و تجروبه سی گوُزوموزون اوُنوندۀ بونو گوستردیکی هـدفه چاتماق اوچون بیرلیک هم فیکیرلییمیز لازیم دیر. نئجه کی گئنج لربو فاکتی اوُزحرکت لرینده گوُستره بیلمیشلر. آزادلیق اوچون تونیس ده ، میصرده نورمال اعتراض لارایله سفربراوُلدولار. لیبی ده مدنی حرکاتی دیکتاتور قذافی سیلاح گوجو ایله قارشیسین آلدی ، مدنی حرکت له پارالل آزادلیق حرکاتچیلاری قذافی یه سیلاح ایله جاواب وئردیلر بو پروسئسین عینیسی ده سوریه ده باش آلیب گئدیر.دیکتاتور اسد رژیمی فیکرائدیرکی ألیندۀ اوُلان سیلاحلار یالنیز اوُزمیللتینی اوُلدورمئگ اوچون حاضیرلانیب ، بیرحالدا کی اوُردونون ألیندۀ اوُلان سیلاحلارخاریجی دوشمان یا دوشمانلار اوُلکه اراضی سینه یا میللتین منافعینه آشکار شئکیلده تجاوزائدرلرسه ، اوُلکۀ دن ومیللت دن مدافعه ائدیلسین دئیۀ حاضیرلانمیشدیر.
آنجاق گوُردوک کی دیکتاتورلار، مدنی حرکتلرله اوُزلئشدیکدۀ ، مقام لارینی ترک اتمیرلر، بعضاً ده میللتین سئسین بوغماق اوُچون اوُنلاری سیلاحلی مبارزه یه مجبور ائدیرلر. سوریه ده اسد اوُزجینایت لرینه و اشکنجه لرینه داوام ائدرسه ، اوُزامان میللت اوُزگوجون توپلایب ، سفربر اوُلونوب اسد و باشقا دیکتاتورلاری تاریخین چوُپلوگونه آتاجاقلار. آنجاق ایران دئیلن یئره کئلدیکده ، سوریه دن سوُنرا و یا اوُنونلا پارالل اوُلاراق هئرحالدا سیراسی گئلیب چاتاجاق ، بو مسئله نی ایران رژیمی نین باشچی لاریدا چوُخ آیدین بیلیرلر، اوُنلاریندا تاریخین چوُپلویونه توُکولمه لرینین زامانی گئلیب چاتمیشدیر، حتی ایران آدلانان دوسداغدا یاشییان میللت لرده بومسئله نی چوخدان بیلمیشلر. ایران دئیلن یئرده آذربایجانین بالالاری یئنه دۀ مهرآییندا مکتب لرین آچیلیشی زامانی ، اوُز آنا دیللرینین اوُیرنمه سیندن محروم اوُلوبلار، یئنه ده گئرئک زوراکیلیقلا یاد دیلینی اوُیرنمئیه مجبور اوُلالار. تهران رژیمی شوینیست سیاستی ایله ، اوُز قبرینی اوُز ألی ایله قازماقا مشغول دور. بو رژیمین نه ایقتصاد دان ، نه سیاست دن و نه ده طبیعت دن هئچ بیر بیلگیسی یوخدور. رژیمین جهالتین بیزاورموگولون تراژدی سینده گوُردوک . رژیم قصدن وایرقچی دوشونجه لراوُزریندن گوُلون اطرافیندا سانسیزحسابسیز درین قویولارین قازیلماسی و سدلرین تیکیلمۀ سی ایلۀ آذربایجانین گوُز بئبئگی اوُلان گوُزل اورمو گوُلونون قورودولماسین حیاسیزجاسینا هئچ اوُزلرینه دۀ گئتیرمیر. رژیم آذربایجان میللتینه و اوُنون میللی حرکاتینا آچیق جاسینا ساواش اعلان ائدیر.آنجاق شوینیست ، گئریجی فارس رژیمی بونودا بیلمه لی دیرکی آذربایجان میللتی هرزاماندان داها آرتیق آیدینلاشیب ؤ اوُیانمیشدیر، میللتیمیزاوُز طبیعی ، قانونی حاق لارین ألده اتمئگۀ قرارلی دیر. هرهانسی ایرقچی فاشیست قووه بو بوُیوک میللتین گوجونون قارشی سین آلماق ایسته سه دۀ ، میللت سئلینین قارشیسندا داغیلیب ، محو اولوب آرادان گئده جئک . آذربایجان میللتی دوز گوُنلوکله درک ائدیب و بیلیرکی اوُنون گئله جئک خوشبخت لیگی ، ایقتصادی ، سیاسی ، ایحتماعی، مدنی منافعی ، فاشیست تهران رژیمی نین محو اوُلماسی ایله ألده اتمئگ اوُلار. بو حقیقتی درک ائدن میللتیمیزمیللی تشکیلات لاریمیزلا بیرگه حرکت ائدیرلر.هئچ شوبهه یوخدورکی آذربایجان تورکلری نین ظفر قازاندیق لاری حالدا بوتون دمکراتیک دوولت لر، بین الخاق تشکیلاتلار، اینسان حاقلاریندان مدافعه ائدن قوروملار، بیرلئشمیش میللت لر تشکیلاتی بیزیم میللتیمیزین وارلیقیندان حمایه ائدرک ، تهران رژیمی نین محو اوُلماسیندان سئوینیب ، شاد اوُلاجاق لار. میللتیمیز ائله بیر بویوک گونون آرزوسوندا اولاراق مجادیله ائدیرلر.
یاشاسین گوُنئی آذربایجانین میللی آزادلیق حرکاتی . محو اوُلسون تهران شوینیست ؤ ایرتیجاع رژیمی .
آذربایجان سوسیال دمکرات پارتیسی . 23 دی ـ 1392
